ചക്കരക്കല്‍: നാല് കിലോഗ്രാം കഞ്ചാവുമായി രണ്ടുപേര്‍ എക്‌സൈസ് പിടിയില്‍.
കൂത്തുപറമ്പ് മെരുവമ്പായി കോറോത്ത് വീട്ടില്‍ നാസര്‍(45), മൂരിയാട് ചമ്മയില്‍ വീട്ടില്‍ കെ.പി ബാദുഷ(43) എന്നിവരെ ഓട്ടോ സഹിതം താഴെച്ചൊവ്വ കീഴുത്തള്ളയില്‍ വച്ചാണ് ഉത്തര മേഖല ജോ. എക്‌സൈസ് കമ്മ്ിഷണറുടെ സ്‌പെഷല്‍ സ്‌ക്വാഡ് എക്‌സൈസ് ഇന്‍സ്‌പെക്ടര്‍ എം. ദിലീപിന്റെ നേതൃത്വത്തില്‍ അറസ്റ്റ് ചെയ്തത്. ദിവസങ്ങളോളം എക്‌സൈസിന്റെ നിരീക്ഷണത്തിലായിരുന്നു പ്രതികളില്‍ ഒരാള്‍.
ആന്ധ്രയില്‍നിന്ന് കണ്ണൂരിലെ ആവശ്യക്കാര്‍ക്ക് കിലോ കണക്കിന് കഞ്ചാവ് എത്തിക്കുന്ന പ്രധാന കണ്ണികളാണ് ഇവര്‍. വേഷത്തിലും പെരുമാറ്റത്തിലും ഉദ്യോഗസ്ഥര്‍ എന്നു തോന്നിക്കും വിധമാണ് കഞ്ചാവുമായി ഇവര്‍ വിതരണത്തിനെത്തുന്നത്.
എട്ടു വര്‍ഷമായി ഇവര്‍ പിടിക്കപ്പെടാതെ കണ്ണൂരില്‍ കഞ്ചാവ് വില്‍പന നടത്തിവരികയായിരുന്നു. നാസറിന് ആന്ധ്രയുമായി നേരിട്ട് ബന്ധമുള്ളതിനാല്‍ ഇയാള്‍ കഞ്ചാവ് ട്രെയിന്‍ മാര്‍ഗം സ്ഥിരം കടത്തിക്കൊണ്ടുവന്ന് വിതരണം നടത്തിയ ഉടന്‍ രക്ഷപ്പെടുകയാണ് പതിവ്.
ബാദുഷ കണ്ണൂരിലെ പ്രധാന കഞ്ചാവ് കച്ചവടക്കാരുമായി ഇടപ്പെട്ട് ഓര്‍ഡറുകള്‍ എടുത്ത് നാസറുമായി ബന്ധപ്പെട്ട് കഞ്ചാവ് എത്തിയാല്‍ കാറിലും ഓട്ടോയിലുമായി സഞ്ചരിച്ച് വിതരണം ചെയ്യുകയാണ് പതിവെന്ന് എക്‌സൈസ് അറിയിച്ചു.
എക്‌സൈസ് ഇന്റലിജന്‍സ് ബ്യൂറോയിലെ എക്‌സൈസ് ഇന്‍സ്‌പെക്ടര്‍ ആനന്ദ് കുമാര്‍, പ്രിവന്റീവ് ഓഫിസര്‍മാരായ വി.പി ഉണ്ണികൃഷ്ണന്‍, പ്രജീഷ് കുന്നുമ്മല്‍. ഉത്തരമേഖല ജോ. എക്‌സൈസ് കമ്മിഷണര്‍ സ്‌ക്വാഡ് അംഗങ്ങളായ വി.കെ വിനോദ്, സി.എച്ച് റിഷാദ്, പി. രജിരാഗ്, എം. രജിത്ത് കുമാര്‍, എം.ബി സുരേഷ് ബാബു, കെ. ബിനീഷ് എന്നിവരും പ്രതികളെ പിടികൂടിയ സംഘത്തിലുണ്ടായിരുന്നു.