മട്ടന്നൂര്‍: കണ്ണൂര്‍ അന്താരാഷ്ട്ര വിമാനത്താവളത്തില്‍ സ്ഥാപിക്കാനുള്ള ആറാമത്തെ എയ്‌റോ ബ്രിഡ്ജുമായുള്ള ട്രക്ക് ഇന്നലെ വൈകിട്ടോടെ വിമാനത്താവള പ്രദേശത്ത് എത്തി. ചൈനയില്‍നിന്ന് ഇറക്കുമതി ചെയ്ത മൂന്ന് എയ്‌റോബ്രിഡ്ജുകള്‍ കപ്പല്‍മാര്‍ഗം മെയ് 7ന് ചെന്നൈയിലെത്തിച്ചാണ് ട്രക്കില്‍ കയറ്റി കൊണ്ടുവന്നത്. രണ്ടു ട്രക്കുകള്‍ കഴിഞ്ഞ വെള്ളിയാഴ്ച എത്തിയിരുന്നെങ്കിലും ഒരു ട്രക്ക് തകരാര്‍ കാരണം കോഴിക്കോട് നിര്‍ത്തിയിടുകയായിരുന്നു. കഴിഞ്ഞ ദിവസം കോഴിക്കോട് നിന്നു പുറപ്പെട്ട ട്രക്ക് ബുധനാഴ്ച ഉച്ചയോടെ നാടാലിലെത്തിയിരുന്നെങ്കിലും തകരാര്‍ സംഭവിച്ചതോടെ നിര്‍ത്തിയിടുകയായിരുന്നു. തകരാര്‍ പരിഹരിച്ചതിനു ശേഷമാണ് ട്രക്ക് പുറപ്പെട്ടത്. 34 മീറ്റര്‍ നീളമുള്ള എയ്‌റോബ്രിഡ്ജുകള്‍ കൊണ്ടുവന്ന മറ്റു ട്രക്കുകള്‍ അഴിയൂരില്‍ കുടുങ്ങിയിരുന്നെങ്കിലും ഈ ട്രക്കിനു കാര്യമായ തടസങ്ങളൊന്നുമുണ്ടായില്ല. ഒന്നര വര്‍ഷം മുന്‍പ് മൂന്ന് എയ്‌റോ ബ്രിഡ്ജുകള്‍ വിമാനത്താവളത്തിലെത്തിച്ചിരുന്നു.