പാലാ : ലൈസന്‍സില്ലാത്ത നാടന്‍ തോക്കുമായി മധ്യവയസ്‌കന്‍ പിടിയില്‍. മേവട തോടനാല്‍ പാറേക്കാട്ടില്‍ ജോസഫ് (55) ആണ് പിടിയിലായത്. വെള്ളിയാഴ്ച പുലര്‍ച്ചെ മൂന്നുമണിയോടെ പൈക കൊച്ചുകൊട്ടാരം റോഡില്‍ നിന്നാണ് ഇയ്യാളെ പൊലിസ് പിടികൂടിയത്. ചെറുമൃഗങ്ങളെ വെടിവച്ച് പിടിക്കുന്നതിനാണ് തോക്കുമായി പോയതെന്ന് പൊലിസിന് മൊഴി നല്‍കി. തോക്കിന് ലൈസന്‍സ് ഇല്ലെന്ന് പൊലിസ് പറഞ്ഞു. തോക്കിലുപയോഗിക്കുന്ന വെടിമരുന്ന്, ചില്ല്, ചിരട്ട, കോക്ക്, പ്ലസ്റ്റിക്, പിന്‍, ഹെഡ്‌ലൈറ്റ്, പോണി എന്നിവയും ഇയ്യാളില്‍ നിന്ന് പിടിച്ചെടുത്തിട്ടുണ്ട്.
    സ്റ്റേഷന്‍ പരിധിക്കുള്ളില്‍ അടുത്തിടെയായി മോഷണം പെരുകിയ സാഹചര്യത്തില്‍ പാലാ ഡി.വൈ.എസ്.പി, സി.ഐ എന്നിവരുടെ നിര്‍ദ്ദേശത്തെ തുടര്‍ന്ന് രാത്രികാല പരിശോധന ശക്തമാക്കിയിട്ടുണ്ട്. ഇതിന്റെ ഭാഗമായി പൈകഭാഗത്ത് നടത്തിയ പട്രോളിങ്ങിനിടെയാണ് സംശയകരമായ സാഹചര്യത്തില്‍ ജോസഫ് പിടിയിലായതെന്ന് എസ്‌ഐ അഭിലാഷ് കമാര്‍ പറഞ്ഞു. എസ്‌ഐ അഭിലാഷ് കുമാര്‍, ഓഫീസര്‍മാരായ ബിജു, വിജയകുമാര്‍ എന്നിവരുടെ സംഘമാണ് തോക്ക് പിടികൂടിയത്. കോടതിയില്‍ ഹാജരാക്കി റിമാന്‍ഡ് ചെയ്തു.