കൊച്ചി: ഗോകുലം ഗ്രൂപ്പ് സ്ഥാപനങ്ങളിലും ഗോകുലം ഗോപാലന്റെ വസതികളിലും ആദായനികുതി വകുപ്പ് നടത്തിയ റെയ്ഡില്‍ കോടിക്കണക്കിന് രൂപയുടെ നികുതി വെട്ടിപ്പ് കണ്ടെത്തിയതായി സൂചന. ശ്രീഗോകുലം ചിറ്റ്‌സ് നടത്തിയ നികുതി വെട്ടിപ്പ് പ്രാഥമികമായി തന്നെ വ്യക്തമാക്കുന്ന നിരവധി രേഖകള്‍ റെയ്ഡില്‍ പിടിച്ചെടുത്തതായാണ് വിവരം.
കേരളത്തില്‍ മുപ്പതോളം കേന്ദ്രങ്ങളില്‍ ബുധനാഴ്ച ആരംഭിച്ച റെയ്ഡ് ഇന്നലെ രാവിലെയാണ് പൂര്‍ത്തിയായത്. പിടിച്ചെടുത്ത രേഖകള്‍ ആദായ നികുതി വകുപ്പിന്റെ വിവിധ ഓഫിസുകളില്‍ സൂക്ഷിച്ചിരിക്കുകയാണ്.
ചെന്നൈയില്‍ നിന്നുള്ള ആദായനികുതി ഉദ്യോഗസ്ഥര്‍ ഇവ അടുത്ത ദിവസങ്ങളില്‍ ചെന്നൈ ഡയറക്ടറേറ്റിലേക്ക് കൊണ്ടു പോകും. ചെന്നൈ ആസ്ഥാനമായി പ്രവര്‍ത്തിക്കുന്ന ശ്രീഗോകുലം ചിറ്റ്‌സിനെതിരായ അന്വേഷണം ചെന്നൈ ഡയറക്ടറേറ്റാണ് നടത്തുന്നത്.
അതേസമയം റെയ്ഡില്‍ ശ്രീഗോകുലം ചിറ്റ്‌സിന്റെയും ഗോകുലം ഗ്രൂപ്പ് സ്ഥാപനങ്ങളുടെയും കണക്കുകളല്ലാതെ കള്ളപ്പണമോ സ്വര്‍ണമോ ലഭിച്ചില്ലെന്ന് ആദായനികുതി വകുപ്പ് വൃത്തങ്ങള്‍ വ്യക്തമാക്കി.
കഴിഞ്ഞ വര്‍ഷം ആഗസ്റ്റില്‍ മുത്തൂറ്റ് ഗ്രൂപ്പ് സ്ഥാപനങ്ങളില്‍ നടന്നതിന് സമാനമായ റെയ്ഡാണ് ഗോകുലം ഗ്രൂപ്പ് സ്ഥാപനങ്ങളില്‍ നടന്നത്. പിടിച്ചെടുത്ത രേഖകളുടെ പരിശോധന നടത്തിയ ശേഷമേ നികുതി വെട്ടിപ്പിന്റെ കൃത്യമായ കണക്കുകള്‍ ലഭ്യമാകു.