ഫ്‌ളോറിഡ: അമേരിക്കയുടെ ജോണ്‍ ഇസ്‌നറെ പരാജയപ്പെടുത്തി റോജര്‍ ഫെഡറര്‍ മിയാമി ഓപ്പണ്‍ കിരീടം ഉയര്‍ത്തി. പ്രായം തനിക്കൊരു പ്രശ്‌നമല്ലെന്ന് തെളിയിക്കുന്ന പ്രകടനമാണ് ഫെഡറര്‍ കാഴ്ചവച്ചത്. തുടര്‍ച്ചയായ രണ്ട് സെറ്റുകള്‍ പിടിച്ചെടുത്ത ഫെഡറര്‍ ഏകപക്ഷീയമായ വിജയത്തോടെ കിരീടം നേടിയെടുക്കുകയായിരുന്നു.
മുന്‍ ലോക ഒന്നാം നമ്പര്‍ താരമായ ഫെഡറര്‍ തന്റെ 101-ാം കിരീടമാണ് ഇന്നലെ നേടിയത്. മിയാമിയില്‍ ഫെഡററുടെ നാലാമത്തെ കിരീടമാണിത്. ആദ്യ സെറ്റ് അനായാസമായി ഫെഡറര്‍ നേടിയപ്പോള്‍ രണ്ടാം സെറ്റിന്റെ അവസാനത്തില്‍ ഇസ്‌നര്‍ക്ക് പരുക്കേറ്റത് ഫെഡറര്‍ക്ക് മുന്‍തൂക്കം നല്‍കി. 6-1, 6-4 എന്ന സ്‌കോറിനാണ് സ്വിസ് താരം മത്സരവും കിരീടവും നേടിയത്. കിരീടനേട്ടത്തില്‍ 101 ലെത്തിയ ഫെഡറര്‍ക്ക് ഏറ്റവും കൂടുതല്‍ കിരീടം നേടിയ താരമാകാന്‍ ഇനി അധിക ദൂരമില്ല. 109 കിരീടങ്ങള്‍ നേടിയിട്ടുള്ള അമേരിക്കയുടെ ജിമ്മി കോണേഴ്‌സ് ആണ് ഫെഡറര്‍ക്ക് മുന്നിലുള്ളത്. ഇന്ത്യന്‍ വെല്‍സ് മാസ്റ്റേഴ്‌സില്‍ ഡൊമിനിക് തീമിനോട് തോറ്റ ഫെഡററുടെ ഉജ്വല തിരിച്ചുവരാണ് മിയാമിയില്‍ ദൃശ്യമായത്. നോവാക് ജോക്കോവിച്ച് ഉള്‍പ്പെടെയുള്ളവര്‍ മിയാമിയില്‍ മാറ്റുരച്ചിരുന്നു.

മിയാമിയിലെ കിരീടനേട്ടം അവിശ്വസനീയമാണെന്ന് ഫെഡറര്‍ മത്സരശേഷം പറഞ്ഞു. 1999ല്‍ ആണ് താന്‍ ആദ്യമായി ഇവിടെ ചാംപ്യനായത്. ഇപ്പോള്‍ 2019ല്‍ വീണ്ടും കിരീടം നേടിയിരിക്കുന്നു. ഇത് സ്വപ്ന സാഫല്യം കൂടിയാണെന്നും ഫെഡറര്‍ പറഞ്ഞു.