ബഹ്‌റൈന്‍: ബഹ്‌റൈന്‍ ഗ്രാന്‍ഡ് പ്രീയില്‍ മെഴ്‌സിഡെസിന്റെ ലൂയിസ് ഹാമിള്‍ട്ടണ് കിരീടം. മെഴ്‌സിഡസിന്റെ തന്നെ വാള്‍ട്ടേരി ബോട്ടാസ് രണ്ടാം സ്ഥാനത്തെത്തിയപ്പോള്‍ ഫെരാരിയുടെ ചാള്‍സ് ലെക്ലെര്‍ക് മൂന്നാം സ്ഥാനം കരസ്ഥമാക്കി. തന്റെ കന്നി പോള്‍ പൊസിഷനാണ് ബഹ്‌റൈനില്‍ ചാള്‍സ് സ്വന്തമാക്കിയത്. മത്സരത്തില്‍ ചാള്‍സ് ലെക്ലെര്‍ക് ഹാമിള്‍ട്ടണ് മികച്ച വെല്ലുവിളിയാണ് ഉയര്‍ത്തിയത്.

മത്സരശേഷം ചാള്‍സിനെ നേരിട്ടുകണ്ട് അഭിനന്ദിച്ച ഹാമിള്‍ട്ടന്‍ 'ചാള്‍സ് ഇന്ന് നിന്റെ ദിവസമല്ലായിരിക്കാം, നീ മികച്ച രീതിയിലാണ് റേസ് ചെയ്തത്. നിന്നില്‍ ഞാന്‍ നല്ലൊരു റേസറെ കാണുന്നുണ്ടെന്നും ഹാമിള്‍ട്ടന്‍ പറഞ്ഞു. ചാള്‍സ് മികച്ച പ്രകടനമാണ് കാഴ്ചവച്ചത്. 48-ാം ലാപ്പില്‍ ചാള്‍സിന്റെ കാറിന് എന്‍ജിന്‍ തകരാര്‍ സംഭവിച്ചത് മൂലമാണ് ഹാമിള്‍ട്ടന് യുവതാരത്തെ മറികടക്കാന്‍ സാധിച്ചത്. എന്‍ജിന്‍ തകരാറായെങ്കിലും ചാള്‍സ് മൂന്നാം സ്ഥാനം നേടിയെടുത്തു.
റെഡ് ബുള്ളിന്റെ മാക്‌സ് വെര്‍സ്റ്റപ്പന്‍ നാലാം സ്ഥാനത്തും ഫെരാരിയുടെ സെബാസ്റ്റ്യന്‍ വെറ്റല്‍ അഞ്ചാം സ്ഥാനത്തുമാണ് ഫിനിഷ് ചെയ്തത്. ഡ്രൈവര്‍മാരുടെ റേസില്‍ 44 പോയിന്റുമായി ബോട്ടാസ് ആണ് മുന്നില്‍ തൊട്ടുപിറകെ 43 പോയിന്റുമായി ഹാമിള്‍ട്ടണുമുണ്ട്. മൂന്നാം സ്ഥാനത്തുള്ള മാക്‌സ് വെര്‍സ്റ്റാപ്പന് 27 പോയിന്റും നാലില്‍ നില്‍ക്കുന്ന ചാള്‍സ് ലെക്ലെര്‍കിനു 26 പോയിന്റുമാണുള്ളത്.