ന്യൂഡല്‍ഹി: നാട്ടില്‍ അവധിക്കുവന്ന പ്രവാസികള്‍ക്ക് ജോലിചെയ്യുന്ന രാജ്യങ്ങളിലേക്ക് തിരിച്ചുപോകുന്നതിന് മൂന്ന് മാസത്തില്‍ കൂടുതല്‍ വിസാ കാലാവധി നിര്‍ബന്ധമാക്കുന്ന പുതിയ കേന്ദ്ര സര്‍ക്കാര്‍ ചട്ടം സംബന്ധിച്ച് ഡല്‍ഹി ഹൈക്കോടതി കേന്ദ്രസര്‍ക്കാരിനോട് വിശദീകരണം തേടി. ഡല്‍ഹി കെ.എം.സി.സി സമര്‍പ്പിച്ച ഹരജിയില്‍ ജസ്റ്റിസ് അനു ശിവരാമന്‍ അധ്യക്ഷയായ ബെഞ്ചിന്റേതാണ് നടപടി.
ജൂണ്‍ ഒന്നിനാണ് കേന്ദ്രം ഇതുസംബന്ധിച്ച് പുതിയ ചട്ടം ഏര്‍പ്പെടുത്തിയത്. അതേസമയം ജോലിയിതര ആവശ്യങ്ങള്‍ക്ക് വിദേശത്ത് പോവുന്നവര്‍ക്ക് ഒരു മാസത്തെ വിസയില്‍ യാത്ര അനുവദിക്കുന്നതായും ചട്ടം പറയുന്നു. നിലവില്‍ നാട്ടിലുള്ള ആയിരക്കണക്കിന് പ്രവാസികളുടെ ഭാവിയെ സാരമായി ബാധിക്കുന്നതാണ് ഉത്തരവെന്നും ചട്ടം സര്‍ക്കാര്‍ പുനപരിശോധിക്കണമെന്നും കെ.എം.സി.സിക്കുവേണ്ടി ഹാജരായ അഭിഭാഷകന്‍ ഹാരിസ് ബീരാന്‍ ആവശ്യപ്പെട്ടു.
വിസാകാലാധി തീര്‍ന്നാലും തൊഴിലാളികള്‍ക്ക് തങ്ങളുടെ രാജ്യങ്ങളിലേക്ക് മടങ്ങി വരാന്‍ അനുമതി നല്‍കാമെന്ന് ഗള്‍ഫ് രാജ്യങ്ങള്‍ അടക്കം വിവിധ രാജ്യങ്ങള്‍ അറിയിച്ചിരിക്കെയാണ് സ്വന്തം പൗരന്മാരെ അനിശ്ചിതത്വത്തിലാക്കുന്ന തീരുമാനവുമായി കേന്ദ്രം മുന്നോട്ട് വന്നിരിക്കുന്നതെന്ന് ഡല്‍ഹി കെ.എം.സി.സി ജനറല്‍ സെക്രട്ടറി കെ.കെ മുഹമ്മദ് ഹലീം സമര്‍പ്പിച്ച ഹരജി ചൂണ്ടിക്കാട്ടി. ജൂലൈ രണ്ടിന് കേസ് വീണ്ടും പരിഗണിക്കും.