മാഡ്രിഡ്: സിനദിന്‍ സിദാന് കീഴില്‍ സീസണിലെ രണ്ടാം മത്സരത്തിനിറങ്ങിയ റയല്‍ മാഡ്രിഡിന് ജയം. രണ്ടിനെതിരേ മൂന്ന് ഗോളുകള്‍ക്ക് ഹുയസ്‌കയെയാണ് റയല്‍ മറികടന്നത്. മത്സരത്തില്‍ മികച്ച പ്രകടനം പുറത്തെടുത്തെങ്കിലും റയലിനെ ഞെട്ടിച്ചാണ് ലീഗിലെ അവസാന സ്ഥാനക്കാര്‍ കീഴടങ്ങിയത്. മൂന്നാം മിനുട്ടില്‍ കുച്ചോ ഹെര്‍ണാണ്ടസിലൂടെ ആദ്യം മുന്നിലെത്തിയത് ഹുയസ്‌കയാണ്. 25-ാം മിനുട്ടില്‍ ഇസ്‌കോയിലൂടെ തിരിച്ചടിച്ച റയല്‍ 62-ാം മിനുട്ടില്‍ ഡാനി സെബല്ലോസിന്റെ ഗോളില്‍ ലീഡെടുത്തു.
74-ാം മിനുട്ടില്‍ സാബിയര്‍ എക്‌സൈറ്റയിലൂടെ ഹുയസ്‌ക വീണ്ടും റയലിനെ ഞെട്ടിച്ചു. കളി അവസാനിക്കാനിരിക്കെ 89-ാം മിനുട്ടില്‍ കരീം ബെന്‍സേമയാണ് റയലിന്റെ വിജയഗോള്‍ നേടിയത്. ജയത്തോടെ 57 പോയിന്റുമായി ലാലിഗയില്‍ മൂന്നാം സ്ഥാനത്താണ് റയല്‍. രണ്ടാം സ്ഥാനത്തുള്ള അത്‌ലറ്റിക്കോയ്ക്ക് 59ഉം ഒന്നാമതുള്ള ബാഴ്‌സലോണക്ക് 69ഉം പോയിന്റാണുള്ളത്.