രാജാക്കാട്: രാജകുമാരിയില്‍ ഏലം ഡ്രയറിന് തീപിടിച്ച് ലക്ഷങ്ങളുടെ നാശനഷ്ടം. രാജകുമാരി വില്ലേജ് ഓഫിസിനു സമീപം കൊല്ലാര്‍മാലില്‍ ജോയിയുടെ ഏലം ഡ്രയറാണ് പൂര്‍ണമായും കത്തിനശിച്ചത്.
ഇന്നലെ വൈകിട്ട് നാലോടെയാണ് തീപിടിത്തമുണ്ടായത്. ടൗണിലെ വ്യാപാരിയായ ജോയിയും ഭാര്യയും ഈസമയം വീട്ടിലില്ലായിരുന്നു. സമീപവാസികളാണ് ഡ്രയറില്‍നിന്ന് തീയും പുകയും ഉയരുന്നത് കണ്ടത്. ജോയിയും നാട്ടുകാരുംചേര്‍ന്ന് തീ അണയ്ക്കാന്‍ ശ്രമിച്ചെങ്കിലും ശക്തമായ കാറ്റ് തടസമായി. ഏലക്ക ഉണങ്ങുന്നതിനായി ധാരാളം വിറക് ഡ്രയറിനോടുചേര്‍ന്നുള്ള ഷെഡില്‍ സൂക്ഷിച്ചിരുന്നു. വിറകിന് തീപിടിച്ചതോടെ ഡ്രയറും ഷെഡും പൂര്‍ണമായും കത്തിയമര്‍ന്നു.
മൂന്നാര്‍, നെടുങ്കണ്ടം എന്നിവിടങ്ങളില്‍നിന്ന് അഗ്‌നിശമനസേന യൂനിറ്റുകള്‍ സ്ഥലത്തെത്തിയാണ് തീ പൂര്‍ണമായും അണച്ചത്. ഡ്രയറിനകത്തെ യന്തസാമഗ്രികള്‍, ഉപകരണങ്ങള്‍ എന്നിവയും അലുമിനിയം ഷീറ്റ് മേഞ്ഞ മേല്‍ക്കൂരയും കത്തിനശിച്ചു. വൈദ്യുതി ഷോര്‍ട് സര്‍ക്യൂട്ടാണ് അപകടകാരണമെന്നാണ് പ്രാഥമിക നിഗമനം.