കോതമംഗലം: നഗരസഭയുടെയും സാമൂഹ്യ സുരക്ഷ മിഷന്റെയും സംയുക്താഭിമുഖ്യത്തില്‍ വയോജനങ്ങള്‍ക്കായി ആകാശയാത്ര സംഘടിപ്പിച്ചു. കൊച്ചി എയര്‍പോര്‍ട്ടില്‍ നിന്നും തലസ്ഥാന നഗരിയിലെയ്ക്കായിരുന്നു യാത്ര. രാവിലെ 8.30 നായിരുന്ന യാത്ര സംഘം എയര്‍പോര്‍ട്ടില്‍ നിന്ന് പുറപ്പെട്ടത്. സ്‌നേഹതീരം ജെറിയാട്രിക് ടൂറിസം പദ്ധതിയുമായി സഹകരിച്ചാണ് പരിപാടി നടപ്പിലാക്കിയത്. നഗരസഭ ചെയര്‍പേഴ്‌സണ്‍ മഞ്ചു സിജുവാണ് യാത്രയ്ക്ക് നേതൃത്വം നല്‍കിയത്. വീടിന്റെ നാല് ചുവരുകള്‍ക്കിടയില്‍ വിശ്രമ ജീവിതം നയിക്കുന്ന മാതാപിതാക്കള്‍ക്ക് ആകാശയാത്ര വ്യത്യസ്ഥ അനുഭവമായി.
കോതമംഗലം നഗരസഭ പരിധിയില്‍പ്പെടുന്ന 65 നും 90 നും ഇടയില്‍ പ്രായം വരുന്ന 46 പേരൊടൊപ്പം നഗരസഭ ചെയര്‍പേഴ്‌സണ്‍ മഞ്ചു സിജുവും വയോമിത്രം കോര്‍ഡിനേറ്റര്‍ റെന്നി ജോര്‍ജും പോഗ്രാം കോര്‍ഡിനേറ്റര്‍ ജോണ്‍സ് അഗസ്റ്റിനും യാത്രയില്‍ പങ്കെടുത്തു. തലസ്ഥാന നഗരിയിലെ പ്രധാന സ്ഥലങ്ങള്‍ സന്ദര്‍ശിച്ച സംഘം രാത്രിയോടെ ട്രെയിന്‍ മാര്‍ഗ്ഗം തിരിച്ചെത്തി. നഗരസഭയിലെ വയോമിത്രത്തിലെ അംഗങ്ങളായ മാതാപിതാക്കളുടെ മാനസീക ഉല്ലാസത്തിനായി ഇത്തരത്തില്‍ വ്യത്യസ്ഥമായ പരിപാടികള്‍ ഇനിയും നടപ്പാക്കുമെന്ന് നഗരസഭ ചെയര്‍പേഴ്‌സണ്‍ മഞ്ചു സിജു പറഞ്ഞു.