ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ആഴ്‌സനലിന് രണ്ട് ഗോള്‍ ജയം. ആരോണ്‍ റംസി, ലകാസട്ടെ എന്നിവര്‍ നേടിയ ഇരട്ട ഗോളിന്റെ കരുത്തിലായിരുന്നു ആഴ്‌സനല്‍ ന്യൂ കാസില്‍ യുനൈറ്റഡിനെ തകര്‍ത്തത്.

ജയത്തോടെ ആഴ്‌സനലിന് 31 മത്സരത്തില്‍ 63 പോയിന്റായി. 77 പോയിന്റുമായി മാഞ്ചസ്റ്റര്‍ സിറ്റിയും 79 പോയിന്റുമായി ലിവര്‍പൂളുമാണ് ഇനി ആഴ്‌സനലിന് മുകളിലുള്ളത്. രണ്ട് ഗോളുകള്‍ക്ക് ജയിച്ച മത്സരത്തില്‍ ആഴ്‌സനല്‍ ന്യൂ കാസിലിന് മേല്‍ വ്യക്തമായ ആധിപത്യം സ്ഥാപിച്ചു.
71 ശതമാനവും ആഴ്‌സനലിന്റെ കൈവശമായിരുന്നു പന്ത്. അര ഡസന്‍ ഗോളുകള്‍ക്കെങ്കിലും ആഴ്‌സനലിന് ജയിക്കാമായിരുന്നു. പക്ഷെ ഫിനിഷിങ്ങിലെ പോരായ്മയാണ് ആഴ്‌സനലിന് കൂടുതല്‍ ഗോളുകള്‍ നിഷേധിച്ചത്. ഏഴിന് എവര്‍ട്ടനുമായിട്ടാണ് ആഴ്‌സനലിന്റെ അടുത്ത മത്സരം.
മൂന്നാം സ്ഥാനത്തുണ്ടായിരുന്ന ടോട്ടനത്തെ പിന്തള്ളിയാണ് ആഴ്‌സനല്‍ മൂന്നാം സ്ഥാനത്തെത്തിയത്.