തിരുവനന്തപുരം: സംസ്ഥാനം നേരിടുന്ന രൂക്ഷമായ ജലക്ഷാമം ട്രെയിന്‍ സര്‍വിസുകളെയും ബാധിക്കുന്നു. ട്രെയിനുകളില്‍ ആവശ്യത്തിനു ജലം ശേഖരിക്കാനാവാതെ വലയുകയാണ് റെയില്‍വേ അധികൃതര്‍.
തിരുവനന്തപുരം വഴിയുള്ള വണ്ടികളില്‍ പ്രധാനമായും വെള്ളം നിറയ്ക്കുന്ന തലസ്ഥാനത്തെ റെയില്‍വേ ടെര്‍മിനലുകളായ തിരുവനന്തപുരം സെന്‍ട്രല്‍, കൊച്ചുവേളി എന്നിവിടങ്ങളില്‍ കടുത്ത ജലക്ഷാമമാണ് അനുഭവപ്പെടുന്നത്. തിരുവന്തപുരം സെന്‍ട്രലില്‍ 12 ലക്ഷം ലിറ്റര്‍ വെള്ളവും കൊച്ചുവേളിയില്‍ മൂന്നര ലക്ഷം ലിറ്ററുമാണ് പ്രതിദിന ആവശ്യം. ഇതിന് ജല അതോറിറ്റിയെയാണ് പ്രധാനമായി ആശ്രയിക്കുന്നത്. എന്നാല്‍, നഗരത്തില്‍ ജലവിതരണത്തിന് നിയന്ത്രണം ഏര്‍പ്പെടുത്തിയതിനാല്‍ ലഭിക്കുന്ന വെള്ളത്തില്‍ ഗണ്യമായ കുറവുണ്ടായിട്ടുണ്ട്. ഈ സാഹചര്യത്തില്‍ കോട്ടയം, ആലപ്പുഴ റെയില്‍വേ സ്റ്റേഷനുകളില്‍നിന്ന് വെള്ളം നിറയ്ക്കുന്ന കാര്യം റെയില്‍വേ പരിഗണനയിലുണ്ട്. ജലവിതരണം പൂര്‍വസ്ഥിതിയിലാകുന്നതുവരെ യാത്രക്കാര്‍ സഹകരിക്കണമെന്ന് ദക്ഷിണ റെയില്‍വേ അഭ്യര്‍ഥിച്ചു.