ബെയ്ജിങ്: അരുണാചല്‍ പ്രദേശ്, തായ്‌വാന്‍ എന്നിവ രേഖപ്പെടുത്താത്ത ലോക മാപ്പുകളോടുള്ള ചൈനയുടെ കലിപ്പ് അവസാനിക്കുന്നില്ല. ഈ പ്രദേശങ്ങള്‍ ഉള്‍പ്പെടുത്താതെ പ്രസിദ്ധീകരിച്ച മൂന്നുലക്ഷത്തില്‍ കൂടുതല്‍ മാപ്പുകള്‍ നശിപ്പിക്കാന്‍ ചൈനീസ് കസ്റ്റംസ് അധികൃതര്‍ ഉത്തരവിട്ടു.
കൂടാതെ ഈ മാപ്പുകള്‍ നെതര്‍ലന്‍ഡിലേക്ക് കയറ്റിയയക്കാന്‍ ശ്രമിച്ചതിന് നാല് പേര്‍ക്കെതിരേ കേസെടുക്കുകയും ചെയ്തു. സമാനമായ പ്രസിദ്ധീകരണം നടത്തിയതിന് കഴിഞ്ഞ മാസം 30,000 ലോക മാപ്പുകള്‍ ചൈന നശിപ്പിച്ചിരുന്നു.

ഇന്ത്യയുടെ വടക്കുകിഴക്കന്‍ സംസ്ഥാനമായ അരുണാചല്‍പ്രദേശ് തെക്കന്‍ ടിബറ്റിന്റെ ഭാഗമാണെന്നാണ് ചൈനയുടെ അവകാശവാദം. സ്വയംഭരണ പ്രദേശമായ തായ്‌വാന്‍ സ്വതന്ത്ര രാജ്യമല്ലെന്നും തങ്ങളുടെ ഭാഗമാണെന്നുമാണ് ചൈന പറയുന്നത്.

തെക്കന്‍ ചൈനയിലെ ഗോണ്ട്വാങ് പ്രവിശ്യയിലാണ് മൂന്ന് ലക്ഷത്തോളം മാപ്പുകള്‍ നശിപ്പിക്കുന്നതെന്ന് ചൈനീസ് വാര്‍ത്താ ഏജന്‍സിയായ ഗ്ലോബല്‍ ടൈംസ് റിപ്പോര്‍ട്ട് ചെയ്തു. ഗോണ്ട്വാങ് പ്രവിശ്യയിലെ വെഞ്ചിദു ബ്യൂറോ കസ്റ്റംസ് അധികൃതര്‍ ജനുവരി 17ന് തെറ്റായി അച്ചടിച്ച 2,64,983 ഇംഗ്ലീഷ് മാപ്പുകള്‍ പിടിച്ചെടുത്തെന്നും ഗ്ലോബല്‍ ടൈംസ് റിപ്പോര്‍ട്ട് ചെയ്തു.

ഡോഗ്വാങ് പ്രദേശത്തുള്ള കമ്പനിയാണ് മാപ്പുകള്‍ പ്രസിദ്ധീകരിച്ചത്. പ്രശ്‌നങ്ങളുള്ള 3,06,057 മാപ്പുകളാണ് ഇപ്പോള്‍ നശിപ്പിക്കുന്നതെന്ന്് കസ്റ്റംസ് ഉദ്യോഗസ്ഥന്‍ വാങ് പറഞ്ഞു.
ഈ മാപ്പുകള്‍ രാജ്യത്തിന്റെ പ്രാദേശിക പരമാധികാരത്തെ അപകടത്തിലാക്കുന്നതാണെന്നും അദ്ദേഹം കൂട്ടിച്ചേര്‍ത്തു.
അരുണാചല്‍പ്രദേശില്‍ ഇന്ത്യന്‍ നേതാക്കള്‍ സന്ദര്‍ശനം നടത്തുന്നതിനെ ചൈന ശക്തമായി എതിര്‍ക്കാറുണ്ട്.
നിയന്ത്രണാതിര്‍ത്തിയില്‍ അരുണാചല്‍ പ്രദേശിലെ 3,488 കി.മീ പ്രദേശത്താണ് ഇന്ത്യയുടെയും ചൈനയുടെയും ഇടയില്‍ തര്‍ക്കമുള്ളത്. പ്രശ്‌ന പരിഹാരത്തിനായി ഇരു രാജ്യങ്ങള്‍ക്കുമിടയില്‍ 21 തവണ ചര്‍ച്ച നടത്തിയെങ്കിലും ശാശ്വത പരിഹാരത്തില്‍ എത്താനായില്ല.