ചങ്ങരംകുളം: കോലത്തുപാടം കോള്‍ പടവിലെ കോലത്ത് താഴം പ്രദേശത്ത് നവീകരണാര്‍ഥം കുളത്തില്‍ നിന്നും മണ്ണ് എടുക്കുന്നതിന്റെ മറവില്‍ വ്യാപകമായി കൃഷിയിടം നികത്തുന്നതായി നാട്ടുകാരുടെ പരാതി. കോള്‍പടവിന്റെ സമീപം സ്ഥിതി ചെയ്യുന്ന മൂന്ന് കുളങ്ങളില്‍ നിന്നായി എടുക്കുന്ന മണ്ണ് സമീപത്തെ കൃഷിയിടം നികത്തുന്നതിനായാണ് ഉപയോഗിക്കുന്നത്. കോള്‍ പടവിലെ കൊയ്ത്ത് കഴിഞ്ഞതോടെ വെള്ളം വറ്റിയ കുളങ്ങളില്‍ നിന്നും  മണ്ണ് മാന്തിയന്ത്രം ഉപയോഗിച്ചാണ് മണ്ണ്  എടുക്കുന്നത്. ചേറാച്ചികുളം, പുത്തന്‍കുളത്തിന് സമീപം, പാങ്ങാട്ടു പാടം എന്നിവിടങ്ങളിലായാണ് കുളത്തിലെ മണ്ണെടുത്ത് പാടം നികത്തുന്നത്. ഇതേതുടര്‍ന്ന് ചേറാച്ചിക്കുളത്തിന് സമീപത്തെ നികത്തലിനെതിരേ  നാട്ടുകാര്‍ പരാതിയുമായി രംഗത്തെത്തിയിട്ടുണ്ട്. എന്നാല്‍ ബന്ധപ്പെട്ട അധികൃതര്‍ നടപടിയെടുക്കുന്നില്ലെന്നും മൗനം നടിക്കുയാണെന്നും പരാതി ഉയരുന്നു. കോള്‍ പടവിലെ വ്യാപകമായ നികത്തലിനെതിരേ കോള്‍ പടവ് കമ്മിറ്റിയും വില്ലേജ്  കൃഷി വകുപ്പ് അധികൃതരും ശക്തമായ നടപടി സ്വീകരിക്കണമെന്ന് പ്രദേശവാസികള്‍ ആവശ്യപ്പെട്ടു. പരാതിയെ തുടര്‍ന്ന് ചേറാച്ചിക്കുളം ഭാഗത്തെ നികത്തലിനെതിരേ നിര്‍ത്തിവെക്കാനുള്ള ഉത്തരവ് നല്‍കിയിട്ടുണ്ട്.