ടോക്കിയോ: മധ്യ, പടിഞ്ഞാറന്‍ ജപ്പാനിലുണ്ടായ ശക്തമായ മഴയെ തുടര്‍ന്നുള്ള പ്രളയത്തിലും മണ്ണിടിച്ചിലിലുമായി 38 പേര്‍ മരിച്ചു. 50 പേരെ കാണാതായി. 15 ലക്ഷം പേരെ ഒഴിപ്പിച്ചു. മരിച്ചവരില്‍ ഭൂരിഭാഗവും ഹിരോഷ്മ പ്രദേശത്തുള്ളവരാണ്. വ്യാഴാഴ്ച മുതല്‍ ആരംഭിച്ച ശക്തമായ മഴയില്‍ നൂറ്കണക്കിന് വീടുകള്‍ തകര്‍ന്നു. കാണാതായവര്‍ക്കായി രക്ഷാപ്രവര്‍ത്തകര്‍ തിരച്ചില്‍ തുടരുകയാണ്. നിരവധി പേര്‍ ചളിക്കടിയില്‍ കുടുങ്ങിയിട്ടുണ്ടെന്ന് ജപ്പാന്‍ വാര്‍ത്താ ഏജന്‍സിയായ ക്വയ്‌ദോ റിപ്പോര്‍ട്ട് ചെയ്തു. 

തലസ്ഥാനമായ ടോകിയോയില്‍ 600 കി.മീ അകലെയുള്ള മോട്ട്യാമാ നഗരത്തില്‍ വെള്ളിയാഴ്ച മുതല്‍ ഇന്നലെ രാവിലെ വരെ 23 ഇഞ്ച് അളവിലാണ് മഴ പെയ്തതെന്ന് ജപ്പാന്‍ ദുരന്ത നിവാരണ സംഘം പറഞ്ഞു. വരും ദിവസങ്ങളില്‍ ശക്തമായ മഴയുണ്ടാവാന്‍ സാധ്യതയുണ്ടെന്ന് ഹോന്‍ഷു ദ്വീപ് നവാസികള്‍ക്ക് ജപ്പാന്‍ കാലാവസ്ഥ വകുപ്പ് മുന്നറിയിപ്പ് നല്‍കി. പുഴകള്‍ നിറഞ്ഞൊഴുകി. പ്രദേശത്ത് ശക്തമായ കാറ്റാണുള്ളത്. ജപ്പാനിലുണ്ടായ ഏറ്റവും ശക്തമായ മഴയാണ് ഇപ്പോഴുള്ളതെന്നാണ് വിലയിരുത്തുന്നത്.
ദുരന്ത പ്രദേശങ്ങളില്‍ 48,000 പൊലിസുകാര്‍, അഗ്നിശമന പ്രവര്‍ത്തകര്‍, ജപ്പാന്‍ പ്രതിരോധന സേന എന്നിവരെ വിന്യസിച്ചുവെന്ന് കാബിനറ്റ് സെക്രട്ടറി യോഷിഹിദ സുകപറഞ്ഞു.