മലപ്പുറം: നെല്‍വയല്‍- തണ്ണീര്‍ത്തട ഭേദഗതി ബില്ലുമായി ബന്ധപ്പെട്ട് ജനങ്ങള്‍ക്കുണ്ടാകുന്ന നേട്ടങ്ങള്‍, നഷ്ടങ്ങള്‍ എന്നിവ വിലയിരുത്തി റിപ്പോര്‍ട്ട് സമര്‍പ്പിക്കാന്‍ ജില്ലാ കലക്ടര്‍മാര്‍ക്ക് നിര്‍ദേശം. സംസ്ഥാനത്ത് ഭൂമിയുമായി ബന്ധപ്പെട്ട് നിലനില്‍ക്കുന്ന പ്രശ്‌നങ്ങള്‍ പരിഹരിക്കുന്നതിനുവേണ്ടി റവന്യൂ മന്ത്രി ഇ. ചന്ദ്രശേഖരന്‍ നാളെ തലസ്ഥാനത്ത് ജില്ലാ കലക്ടര്‍മാരുടേയും മുതിര്‍ന്ന ഉദ്യോഗസ്ഥരുടേയും യോഗം വിളിച്ചുചേര്‍ത്തിട്ടുണ്ട്. ഈയോഗത്തിലാണ് കലക്ടര്‍മാര്‍ റിപ്പോര്‍ട്ട് സമര്‍പ്പിക്കേണ്ടത്. നിയമസഭ പാസാക്കിയ തണ്ണീര്‍ത്തട നിയമ ഭേദഗതി ബില്ലില്‍ കര്‍ഷകരെ പ്രതികൂലമായി ബാധിക്കുന്ന വ്യവസ്ഥകളെ സംബന്ധിച്ച് ആശങ്കകള്‍ നിലനില്‍ക്കേയാണ് മന്ത്രി യോഗം വിളിച്ചുചേര്‍ത്തിട്ടുള്ളത്. 2008നു മുന്‍പ് നെല്‍വയല്‍ നികത്തിയത് ക്രമവര്‍ക്കരിച്ച് നല്‍കുന്നതിന് ന്യായവിലയുടെ അമ്പത് ശതമാനം പിഴ ഈടാക്കണമെന്ന വ്യവസ്ഥയാണ് സംസ്ഥാനത്തെ നൂറുകണക്കിന് കര്‍ഷകര്‍ക്ക് തിരിച്ചടിയാകുന്നത്. ജല ലഭ്യതയുടേയും ഉല്‍പാദനക്ഷമതയുടേയും കുറവ് മൂലം നെല്‍കൃഷി ലാഭകരമല്ലാത്തതിനെ തുടര്‍ന്നാണ് നെല്‍കൃഷി ഉപേക്ഷിച്ച് മെച്ചപ്പെട്ട ലാഭത്തിനുവേണ്ടി മറ്റ് കൃഷികളിലേക്ക് മാറിയത്. എന്നാല്‍ പുതിയ നിയമപ്രകാരം ഇത്തരത്തില്‍ വയല്‍ നികത്തിയവര്‍ ലക്ഷങ്ങള്‍ പിഴ അടക്കേണ്ടിവരും. നെല്‍കൃഷി ഉപേക്ഷിച്ച് തോട്ട കൃഷിയിലേക്ക് വര്‍ഷങ്ങള്‍ക്ക് മുന്‍പ് മാറിയ കര്‍ഷകര്‍ ഇതുവരെ കൃഷിചെയ്തുണ്ടാക്കിയ സമ്പാദ്യം മുഴുവന്‍ സര്‍ക്കാര്‍ ഖജനാവിലേക്ക് പിടിച്ചെടുക്കുന്നതാണ് ഭേദഗതി ബില്ലിലെ ക്രമവല്‍ക്കരണ വ്യവസ്ഥ. ഇത് കടുത്ത കര്‍ഷക ദ്രോഹവും അന്യായവുമാണെന്നാണ് കര്‍ഷകരുടെ ആക്ഷേപം. ഇതുസംബന്ധിച്ച് യോഗത്തില്‍ വിശദമായ ചര്‍ച്ചയുണ്ടാകും. ജില്ലകളില്‍ റവന്യൂ വകുപ്പ് നടപ്പാക്കുന്ന പ്രത്യേക പദ്ധതികളും വില്ലേജുകളില്‍ തീര്‍പ്പാകാതെ കിടക്കുന്ന ഭൂപ്രശ്‌നങ്ങളും യോഗത്തില്‍ ചര്‍ച്ചയാകും. അഡീഷനല്‍ ചീഫ് സെക്രട്ടറി, ലാന്റ് റവന്യൂ കമ്മിഷണര്‍, ജോ.കമ്മിഷണര്‍, ലാന്റ് ബോര്‍ഡ് സെക്രട്ടറി തുടങ്ങിയ ഉദ്യോഗസ്ഥരും യോഗത്തില്‍ പങ്കെടുക്കും.