കൊണ്ടോട്ടി: റേഷന്‍ കാര്‍ഡിനായി സംസ്ഥാനത്ത് 10 ദിവസത്തിനിടെ ലഭിച്ച അപേക്ഷകള്‍ 3,73,338. കഴിഞ്ഞ മാസം 25 മുതലാണ് പുതിയ റേഷന്‍ കാര്‍ഡിനും അനുബന്ധ ആവശ്യങ്ങള്‍ക്കുമായി സംസ്ഥാനത്തെ 81 താലൂക്ക് സപ്ലൈ ഓഫിസുകളിലും സിറ്റി റേഷനിങ് ഓഫിസുകളിലും അപേക്ഷ സ്വീകരണം തുടങ്ങിയത്. 

തൃശൂര്‍, പാലക്കാട്, കൊല്ലം, മലപ്പുറം ജില്ലകളിലാണ് കൂടുതല്‍ അപേക്ഷകരുള്ളത്.തൃശൂര്‍ ജില്ലയിലെ തലപ്പള്ളിയാണ് ഏറ്റവും കൂടുതല്‍ അപേക്ഷകള്‍ ലഭിച്ച താലൂക്ക്. 12,000 അപേക്ഷകളാണ് തലപ്പള്ളി താലൂക്കില്‍ ലഭിച്ചത്.
നാലുവര്‍ഷത്തിന് ശേഷമാണ് സിവില്‍ സപ്ലൈസ് വകുപ്പ് പുതിയ അപേക്ഷകള്‍ സ്വീകരിച്ചു തുടങ്ങിയത്. ഇതാണ് അപേക്ഷകള്‍ ക്രമാതീതമായി കൂടാന്‍ കാരണം.താലൂക്ക് സപ്ലൈ ഓഫിസുകളിലെ തിരക്ക് കണക്കിലെടുത്ത് മിക്കയിടങ്ങളിലും ഗ്രാമപഞ്ചായത്തുകള്‍ക്ക് കേന്ദ്രീകരിച്ച് പ്രത്യേക അദാലത്തുകള്‍ നടത്തിവരികയാണ്. ദിവസവും എഴുന്നൂറുമുതല്‍ ആയിരംവരെ അപേക്ഷകള്‍ ലഭിക്കുന്നുണ്ട്. ഒരു ദിവസം 1,500 അപേക്ഷകള്‍ ലഭിച്ച താലൂക്കുകളുമുണ്ട്.
പുതിയ റേഷന്‍ കാര്‍ഡ്, നിലവിലുള്ള കാര്‍ഡ് മറ്റൊരു താലൂക്കിലേക്കു മാറ്റല്‍, കാര്‍ഡിലെ അംഗങ്ങളെ മറ്റ് താലൂക്കിലേക്ക് മാറ്റല്‍, പുതിയ അംഗങ്ങളെ ഉള്‍പ്പെടുത്തല്‍, തെറ്റ്തിരുത്തല്‍, ഡ്യൂപ്ലിക്കറ്റ് കാര്‍ഡ്, അംഗങ്ങളെ മറ്റുസംസ്ഥാനത്തേക്ക് മാറ്റല്‍, റേഷന്‍കാര്‍ഡ് മറ്റുസംസ്ഥാനത്തേക്ക് മാറ്റല്‍, കാര്‍ഡ് പുതുക്കാത്തതിന്റെയും കാര്‍ഡില്‍ ഉള്‍പ്പെടുത്താത്തതിന്റെയും സര്‍ട്ടിഫിക്കറ്റുകള്‍ തുടങ്ങിയവയുടെ അപേക്ഷകളാണ് നേരിട്ടു സ്വീകരിക്കുന്നത്.
ഓണ്‍ലൈന്‍ അപേക്ഷ സ്വീകരണത്തിന് മുന്‍പ് നേരിട്ട് അപേക്ഷകള്‍ സ്വീകരിച്ചത് സപ്ലൈ ഓഫിസുകള്‍ക്ക് ഇരുട്ടടിയായിട്ടുണ്ട്. അപേക്ഷകള്‍ നേരിട്ട് സ്വീകരിച്ചവ ആധാറുമായി ചേര്‍ത്ത് പുതിയ സോഫ്റ്റ്‌വെയറിലേക്ക് മാറ്റണം, ഓണ്‍ലൈന്‍ രജിസ്‌ട്രേഷന്‍ ഈമാസം 16 മുതല്‍ സ്വീകരിക്കുമെന്ന് അറിയിച്ചിട്ടും നേരിട്ട് നല്‍കുന്നവരില്‍ ക്രമാതീതമായ വര്‍ധനവാണുണ്ടായത്.
ഈ അപേക്ഷകള്‍ പുതിയ സോഫ്റ്റ് വെയറിലേക്ക് മാറ്റിയതിന് ശേഷമെ കാര്‍ഡ് വിതരണം ചെയ്യാന്‍ കഴിയുകയുള്ളൂ. രണ്ട് വയസിന് മുകളില്‍ പ്രായമുള്ള കുട്ടികളുടെ ആധാര്‍ നമ്പറടക്കം റേഷന്‍കാര്‍ഡ് അപേക്ഷയില്‍ ചേര്‍ക്കണം. എന്നാല്‍ ഓണ്‍ലൈനില്‍ അപേക്ഷിക്കുമ്പോള്‍ ഓഫിസ് പ്രവര്‍ത്തനത്തിന്റെ കാലതാമസം ഒഴിവാക്കാനാകും. പുതിയ കാര്‍ഡ് രണ്ട് മാസത്തിനകം നല്‍കാനാണ് തീരുമാനം.