മേപ്പാടി: ഫോറസ്റ്റ് റെയ്ഞ്ച് ഓഫിസിന് മീറ്ററുകള്‍ മാത്രം അകലെ നിന്നും ചന്ദന മരങ്ങള്‍ മുറിച്ച് കടത്തി. മൂന്ന് മരങ്ങളാണ് വന പാലകരുടെ കണ്ണുവെട്ടിച്ച് മോഷ്ടാക്കള്‍ മുറിച്ച് കടത്തിയത്.
വ്യാഴാഴ്ച രാത്രിയിലാണ് മോഷണം നടന്നത്. ചെമ്പോത്തറ റോഡരികിലെ കളി സ്ഥലത്തിന് സമീപത്തെ മരങ്ങളാണ് ആക്‌സോ ബ്ലൈഡ് ഉപയോഗിച്ച് മുറിച്ച് കടത്തിയത്. ആക്‌സോ ബ്ലൈഡിന്റെ പൊട്ടിയ ഭാഗങ്ങള്‍ കണ്ടെത്തിയിട്ടുണ്ട്. മരങ്ങളുടെ മുരടോടെ മുറിച്ച ശേഷം കാതല്‍ മുറിച്ച് കടത്തുകയായിരുന്നു.
മൂന്ന് മരങ്ങളില്‍ നിന്നുമായി ഏകദേശം രണ്ട് മീറ്റര്‍ നീളത്തിലുള്ള തടി നഷ്ടപ്പെട്ടതായാണ് കണക്കാക്കുന്നത്. ചന്ദന മരങ്ങള്‍ സംരക്ഷിക്കുന്നതിനായി രാത്രി കാലങ്ങളില്‍ പോലും പെട്രോളിങ് നടത്തി വരുന്നതിനിടയിലാണ് ചന്ദനം മോഷണം പോയത്. മേപ്പാടി ഫോറസ്റ്റ് റെയ്ഞ്ച് ഓഫിസിന് കീഴില്‍ ചെറുതും വലുതുമായ പതിനായിരത്തോളം ചന്ദന മരങ്ങള്‍ ഉണ്ടന്നാണ് കണക്ക്. ഒന്നര വര്‍ഷത്തിനിടയില്‍ ആദ്യത്തെ മോഷണമാണിത്. നേരത്തെ ഇടക്കിടെ ചന്ദന മരങ്ങള്‍ മോഷണം പോയിരുന്നു.
വിവിധ കേസുകളിലായി പ്രതികള്‍ അറസ്റ്റിലാവുകയും ചെയ്തിട്ടുണ്ട്. ഫോറസ്റ്റ് ഓഫിസിന് സമീപത്തെ തന്നെ ഇരുപതോളം മരങ്ങള്‍ മുറിച്ച് കടത്തിയത് ഏറെ വിവാദമാകുകയും വനം വകുപ്പ് ഉദ്യോഗസ്ഥര്‍ സസ്‌പെന്‍ഷനിലാവുകയും ചെയ്തിട്ടുണ്ട്.
തുടര്‍ന്ന് ചന്ദന മരങ്ങള്‍ സംരക്ഷിക്കുന്നതിനായി പ്രത്യേക തുക വകയിരുത്തി കമ്പിവേലിയിട്ട് സംരക്ഷിച്ച് വരികയാണ്. വേലിയിടാത്ത മരങ്ങളാണ് മോഷണം പോവുന്നതില്‍ കൂടുതലും.
വീണ്ടും ചന്ദന മാേഷണം റിപ്പോര്‍ട്ട് ചെയ്തതോടെ നീരീക്ഷണം ശക്തമാക്കിയതായി റെയ്ഞ്ച് ഓഫിസര്‍ ഹരിചന്ദ്രന്‍ പറഞ്ഞു.