വടകര: വടകര നഗരസഭയുടെ വിദ്യാഭ്യാസ പദ്ധതിയായ 'സ്‌പെയ്‌സ്'ശ്രദ്ധേയമായ നേട്ടം കൈവരിച്ച് മൂന്നാം വര്‍ഷത്തിലേക്ക് പ്രവേശിക്കുമ്പോള്‍ കഴിഞ്ഞ വര്‍ഷത്തെ ഉന്നത വിജയികളെ ഈ മാസം 10ന് അനുമോദിക്കുമെന്ന് നഗരസഭാ വൈസ് ചെയര്‍ പേഴ്‌സണ്‍ പി. ഗീത വാര്‍ത്താസമ്മേളനത്തില്‍ അറിയിച്ചു.
പദ്ധതിയുടെ ഭാഗമായി കഴിഞ്ഞ വര്‍ഷം എസ്.എസ്.എല്‍.സി, പ്ലസ് ടു, എല്‍.എസ്.എസ്, യു.എസ്.എസ്, തുല്യതാ പരീക്ഷകളില്‍ ഉയര്‍ന്ന വിജയമാണ് വടകര നഗര പരിധിയിലെ വിദ്യാര്‍ഥികള്‍ കരസ്ഥമാക്കിയത്. എസ്.എസ്.എല്‍.സി പരീക്ഷയില്‍ 177 വിദ്യാര്‍ഥികളും, പ്ലസ് ടുവിന് 60 പേരും എല്‍.എസ്.എസിന് 95, യു.എസ്.എസിന് 56, തുല്യതാ പരീക്ഷയില്‍ 92 പേരും വിജയിച്ചതായി പി. ഗീത വ്യക്തമാക്കി.
10ന് ഉച്ചക്ക് രണ്ടരക്ക് ടൗണ്‍ ഹാളില്‍ നടക്കുന്ന അനുമോദന ചടങ്ങ് മന്ത്രി ടി.പി രാമകൃഷ്ണന്‍ ഉദ്ഘാടനം ചെയ്യും. അക്കാദമിക് രംഗത്ത് സ്‌പെയ്‌സിന് ഊര്‍ജം പകര്‍ന്ന ഡയറ്റ് ഫാക്കല്‍റ്റി രാജന്‍ ചെറുവാട്ടിന് ചടങ്ങില്‍ യാത്രയയപ്പ് നല്‍കും. വാര്‍ത്താസമ്മേളനത്തില്‍ വിദ്യാഭ്യാസ സ്റ്റാന്റിങ് കമ്മറ്റി ചെയര്‍മാന്‍ വി. ഗോപാലന്‍, കെ. ഗോപാലകൃഷ്ണന്‍, സ്‌പെയ്‌സ് കോര്‍ഡിനേറ്റര്‍ കെ.സി പവിത്രന്‍, സ്‌പെയ്‌സ് വിദഗ്ദ്ധ സമിതി അംഗം ടി. രാധാകൃഷ്ണന്‍ പങ്കെടുത്തു.