കണ്ണൂര്‍:ജില്ലാ ആശുപത്രിയുമായി ബന്ധപ്പെട്ട് ഉയര്‍ന്നുവരുന്ന വിവാദങ്ങള്‍ അനാവശ്യമാണെന്ന് പ്രസിഡന്റ് കെ.വി സുമേഷിന്റെ അധ്യക്ഷതയില്‍ ചേര്‍ന്ന ജില്ലാ പഞ്ചായത്ത് ഭരണസമിതി യോഗം അഭിപ്രായപ്പെട്ടു. ഡോക്ടര്‍മാരുടെ ശമ്പളം മുടങ്ങിയത് അത് കൈകാര്യം ചെയ്യുന്ന സ്പാര്‍ക് സോഫ്റ്റ്‌വെയറുമായി ബന്ധപ്പെട്ട സാങ്കേതിക നടപടിക്രമങ്ങള്‍ പൂര്‍ത്തിയാക്കാത്തതിനാലായിരുന്നു. അവ പൂര്‍ത്തിയാക്കിയതോടെ ശമ്പളം ലഭിക്കുകയുമുണ്ടായി. ആശുപത്രി സൂപ്രണ്ടിന്റെ അവധിയാവട്ടെ അവരുടെ മകന്റെ പഠനവുമായി ബന്ധപ്പെട്ടുമാണ്. ചിലരുടെ നിക്ഷിപ്ത താല്‍പര്യങ്ങളാണ് ആശുപത്രിയെക്കുറിച്ച് ജനങ്ങള്‍ക്കിടയില്‍ അവമതി സൃഷ്ടിക്കുംവിധമുള്ള വിവാദങ്ങള്‍ക്കു പിന്നിലെന്ന് വ്യക്തമായതായി ജില്ലാ പഞ്ചായത്ത് പ്രസിഡന്റ് പറഞ്ഞു. ഈ നില തുടരുകയാണെങ്കില്‍ സര്‍വിസ് ചട്ടമനുസരിച്ച് കാലാവധി പൂര്‍ത്തിയാക്കിയവരെ സ്ഥലം മാറ്റുന്നതുള്‍പ്പെടെയുള്ള നടപടികള്‍ കൈക്കൊള്ളാന്‍ ആരോഗ്യമന്ത്രിയെ സമീപിക്കുമെന്നും ആശുപത്രിയുടെ സുഗമമായ നടത്തിപ്പിനാവശ്യമായ എല്ലാ നടപടികളും ജില്ലാ പഞ്ചായത്തിന്റെ ഭാഗത്തുനിന്നുണ്ടാകുമെന്നും  ചോദ്യത്തിന് മറുപടിയായി കെ.വി സുമേഷ് വ്യക്തമാക്കി. ജില്ലാ ആശുപത്രിയെ സൂപ്പര്‍ സ്‌പെഷ്യാലിറ്റി തലത്തിലേക്കുയര്‍ത്തുന്നതിന് സമര്‍പ്പിച്ച മാസ്റ്റര്‍ പ്ലാന്‍ സംസ്ഥാന സര്‍ക്കാര്‍ അംഗീകരിക്കുകയും കിഫ്ബിയിലുള്‍പ്പെടുത്തി 76 കോടി രൂപ ഇതിനായി അനുവദിക്കുകയും ചെയ്തിരുന്നു. ആശുപത്രിയുടെ വികസന പ്രവര്‍ത്തനങ്ങള്‍ പുരോഗമിക്കുന്ന ഘട്ടത്തിലാണ് അനാവശ്യവിവാദങ്ങളെന്നത് ഖേദകരമാണെന്നും അദ്ദേഹം അഭിപ്രായപ്പെട്ടു.