വടകര: 'വര്‍ഗീയതക്കെതിരേ ഇടതുപക്ഷത്തോടൊപ്പം' എന്ന പ്രമേയത്തില്‍ ഇടതുപക്ഷ മുന്നണിയുടെ നേതൃത്വത്തില്‍ സാംസ്‌കാരിക മഹാസംഗമം നടത്തി. വടകര കോട്ടപ്പറമ്പില്‍ രാവിലെ മുതല്‍ രാത്രിവരെ നീണ്ട പരിപാടി കഥാകൃത്ത് എം. മുകുന്ദന്‍ ഉദ്ഘാടനം ചെയ്തു. ഡോ. ഖദീജാ മുംതാസ്, കെ.പി രാമനുണ്ണി, കരിവള്ളൂര്‍ മുരളി, സി.പി അബൂബക്കര്‍, മനയത്ത് ചന്ദ്രന്‍, കെ.ഇ.എന്‍, രാവുണ്ണി, എ.വി അനില്‍ കുമാര്‍, ചിത്രകാരി കബിത മുഖോപാധ്യായ, ലിസി മുരളീധരന്‍ സംസാരിച്ചു. പി. ജയരാജനെ കുറിച്ച് ദേശാഭിമാനി അസി. എഡിറ്റര്‍ എ.വി അനില്‍കുമാര്‍ എഡിറ്റ് ചെയ്ത 'തളരാത്ത പോരാളി' എന്ന പുസ്തകം മന്ത്രി ടി.പി രാമകൃഷ്ണന്‍ പ്രകാശനം ചെയ്തു. ബാലതാരം നക്ഷത്ര മനോജ് ഏറ്റുവാങ്ങി. മുഖ്യമന്ത്രി പിണറായി വിജയന്‍ ചരിച്ച 'ശബരിമല നവോത്ഥാനം: മതനിരപേക്ഷത' എന്ന പുസ്തകം എം. മുകുന്ദന്‍ പ്രകാശനം ചെയ്തു. നിഹാരിക എസ്.പി മോഹന്‍ ഏറ്റുവാങ്ങി. പി. ജയരാജന്‍ രചിച്ച 'സംഘര്‍ഷങ്ങളുടെ രാഷ്ട്രീയം' എന്ന പുസ്തകത്തിന്റെ രണ്ടാംപതിപ്പ് പ്രകാശനവും നടന്നു. മജീഷ്യന്‍ സനീഷ് വടകര വര്‍ഗീയ വിരുദ്ധ മാജിക്ക് അവതരിപ്പിച്ചു. പ്രസാദ് കൈതക്കല്‍ പൊളിറ്റിക്കല്‍ മാജിക്ക് അവതരിപ്പിച്ചു. വി.കെ ഷാജി പാലക്കാട് രചനയും സംവിധാനവും നിര്‍വഹിച്ച 'കനല്‍വഴികള്‍ താണ്ടി' എന്ന സംഗീത ശില്‍പം പുരോഗമന കലാസാഹിത്യ സംഘം നേതൃത്വത്തില്‍ അവതരിപ്പിച്ചു. കേളു ഏട്ടന്‍ പഠന കേന്ദ്രം ഡയരക്ടര്‍ കെ.ടി കുഞ്ഞിക്കണ്ണന്‍ സ്വാഗതം പറഞ്ഞു.