'മരക്കാപ്പിലെ തെയ്യങ്ങള്‍' മികച്ച നാടകം      
നീലേശ്വരം: തൃശൂര്‍ ഇരിങ്ങാലക്കുട ജ്വാല സാംസ്‌കാരിക വേദി സംസ്ഥാന തലത്തില്‍ സംഘടിപ്പിച്ച അമേച്വര്‍ നാടക മത്സരത്തില്‍ പട്ടേന ജനശക്തി സാംസ്‌കാരിക വേദി അവതരിപ്പിച്ച 'മരക്കാപ്പിലെ തെയ്യങ്ങള്‍' മികച്ച നാടകമായി തിരഞ്ഞെടുത്തു. അംബികാസുതന്‍ മാങ്ങാടിന്റെ നോവലിനെ ആസ്പദമാക്കി പ്രദീപ് മണ്ടൂരാണ് നാടകം രചിച്ചത്. ഇതില്‍ ഉമ്പിച്ചിയെ അവതരിപ്പിച്ച രജിതാരാജന്‍ മികച്ച നടിയായും ഇതിന്റെ സംവിധായകന്‍ പ്രദീപ് മണ്ടൂര്‍ മികച്ച സംവിധായകനായും തിരഞ്ഞെടുക്കപ്പെട്ടു. ഇതിലെ അഭിനയത്തിന് അശ്വതി രവീന്ദ്രനു മികച്ച ബാലനടിക്കുള്ള പുരസ്‌കാരവും ലഭിച്ചു. ജനശക്തി സാംസ്‌കാരിക വേദിയിലെ ഇരുപതോളം പ്രവര്‍ത്തകരാണ് ഇതിന്റെ അരങ്ങിലും അണിയറയിലും പ്രവര്‍ത്തിച്ചത്.