മുക്കം: എസ്.ഡി.പി.ഐ, ജമാഅത്തെ ഇസ്‌ലാമി തുടങ്ങിയ പാര്‍ട്ടികളെയും സംഘടനകളെയും കൂട്ടുപിടിച്ച് സംസ്ഥാനത്ത് ആര്‍.എസ്.എസിന് മുതലെടുക്കാന്‍ അവസരം നല്‍കുകയാണ് കോണ്‍ഗ്രസും മുസ്‌ലിംലീഗും ചെയ്യുന്നതെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍.
മുക്കത്ത് വയനാട് പാര്‍ലമെന്റ് മണ്ഡലത്തിലെ സി.പി.എം ബ്രാഞ്ച് സെക്രട്ടറിമാര്‍ക്കും ലോക്കല്‍ കമ്മിറ്റി അംഗങ്ങള്‍ക്കുമായി സംഘടിപ്പിച്ച പ്രവര്‍ത്തന കണ്‍വന്‍ഷന്‍ ഉദ്ഘാടനത്തിനുശേഷം ശേഷം മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം. ഹിന്ദു വര്‍ഗീയതക്കും മുസ്‌ലിം വര്‍ഗീയതക്കും ഇടത് മുന്നണി എതിരാണ്. വയനാട് മണ്ഡലത്തില്‍ എല്‍.ഡി.എഫ് വിജയിക്കുകയും രാഹുല്‍ ഗാന്ധിയെ തോല്‍പ്പിച്ച് ചരിത്രം സൃഷ്ടിക്കുകയും ചെയ്യും. കഴിഞ്ഞ തവണ പരാജയപ്പെട്ടത് വെറും 20,000 വോട്ടുകള്‍ക്കാണ്. നിയമസഭാ തെരഞ്ഞെടുപ്പില്‍ അത് പിന്നേയും കുറഞ്ഞു. അന്ന് യു.ഡി.എഫിന് ഒപ്പമായിരുന്ന എല്‍.ജെ.ഡി ഇന്ന് ഇടതുപക്ഷത്തോടൊപ്പമാണെന്നും അദ്ദേഹം പറഞ്ഞു. മുക്കം ഇ.എം.എസ് ഓഡിറ്റോറിയത്തില്‍ നടന്ന കണ്‍വന്‍ഷനില്‍ പി.കെ സൈനബ അധ്യക്ഷയായി. ആരോഗ്യമന്ത്രി കെ.കെ ശൈലജ, സി.കെ ശശീന്ദ്രന്‍ എം.എല്‍.എ, ഇ. രമേശ് ബാബു, ടി. വിശ്വനാഥന്‍ സംസാരിച്ചു.