കോഴിക്കോട്: വൈക്കം മുഹമ്മദ് ബഷീര്‍ അനുസ്മരണ വേദിയും കണ്ണൂരിലെ എയറോസിസ് കോളജും സംയുക്തമായി ഏര്‍പ്പെടുത്തിയ ബഷീര്‍ പുരസ്‌കാരങ്ങള്‍ പ്രഖ്യാപിച്ചു. പ്രതിഭാ പുരസ്‌കാരത്തിന് ബാബുരാജ് മ്യൂസിക് അക്കാദമി പ്രിന്‍സിപ്പല്‍ ഡോ. കെ.എക്‌സ് ട്രീസ, സാഹിത്യ പുരസ്‌കാരങ്ങള്‍ക്ക് നടനും നിര്‍മാതാവുമായ ഇബ്രാഹിംകുട്ടി, സംവിധായകനും നടനുമായ മധുപാല്‍, ശാന്തിഗിരി പബ്ലിക്കേഷന്‍സ് ഡെപ്യൂട്ടി എഡിറ്റര്‍ അനില്‍ ചേര്‍ത്തല എന്നിവരെ തിരഞ്ഞെടുത്തു.
ആദ്യ പുസ്തകം പുറത്തിറക്കിയ എഴുത്തുകാരെ പ്രോത്സാഹിപ്പിക്കുന്നതിന്റെ ഭാഗമായുള്ള പ്രത്യേക പുരസ്‌കാരങ്ങള്‍ക്ക് രവീന്ദ്രന്‍ ഇരിണാവ്, രശ്മി നിഷാദ് എന്നിവര്‍ അര്‍ഹരായി. ചലച്ചിത്ര നിര്‍മാതാവ് പി.വി ഗംഗാധരന്‍, സംവിധായകന്‍ മോഹന്‍ കുപ്ലേരി, തിരക്കഥാകൃത്ത് പി.ആര്‍ നാഥന്‍ എന്നിവരാണ് പുരസ്‌കാര ജേതാക്കളെ തിരഞ്ഞെടുത്തത്.
പുരസ്‌കാരങ്ങള്‍ 27ന് വൈകിട്ട് അഞ്ചിന് കോഴിക്കോട് ചാവറ കള്‍ച്ചറല്‍ സെന്ററില്‍ നടക്കുന്ന ചടങ്ങില്‍ വിതരണം ചെയ്യും.