കാഠ്മണ്ഡു: തന്റെ സര്‍ക്കാരിനെ അട്ടിമറിക്കാന്‍ ഇന്ത്യയില്‍ ഗൂഢാലോചന നടക്കുന്നതായി നേപ്പാള്‍ പ്രധാനമന്ത്രി കെ.പി ശര്‍മ ഒലി. മുന്‍ കമ്മ്യൂണിസ്റ്റ് നേതാവ് മദന്‍ ഭണ്ഡാരിയെ അനുസ്മരിക്കുന്നതിന് ഔദ്യോഗിക വസതിയില്‍ വിളിച്ചുചേര്‍ത്ത യോഗത്തിലാണ് അദ്ദേഹം ഇക്കാര്യം വെളിപ്പെടുത്തിയത്. തന്റെ സര്‍ക്കാരിന് പാര്‍ലമെന്റില്‍ ഭൂരിപക്ഷമുള്ളതിനാല്‍ പുറത്താക്കാനുള്ള ശ്രമം പരാജയപ്പെടുമെന്നും അദ്ദേഹം പറഞ്ഞു.
ചിലര്‍ നേപ്പാള്‍ പുതിയ ഭൂപടം തയാറാക്കിയതിനെ ഒരു കുറ്റമായാണ് കാണുന്നതെന്ന് പറഞ്ഞ അദ്ദേഹം നേപ്പാളിന്റെ സ്വന്തം ഭൂമി സംരക്ഷിക്കാനുള്ള ദൃഢനിശ്ചയം ഇന്ത്യയെ നിരാശരാക്കിയെന്നും കൂട്ടിച്ചേര്‍ത്തു. 15 ദിവസത്തിനകം പ്രധാനമന്ത്രി മാറുമെന്ന് നിങ്ങള്‍ കേട്ടിരിക്കും. എന്നാല്‍ ഞാന്‍ പുറത്തായാല്‍ നേപ്പാളിനു വേണ്ടി സംസാരിക്കാന്‍ പിന്നെയാരും ധൈര്യപ്പെടില്ല. കാരണം ആ വ്യക്തിയും വൈകാതെ പുറത്താകും. ഞാന്‍ എനിക്കു വേണ്ടിയല്ല, രാജ്യത്തിനു വേണ്ടിയാണ് സംസാരിക്കുന്നത്. ഇത്തരം ചതിയില്‍ നമ്മുടെ പാര്‍ട്ടി വീഴരുത്. പുറത്താക്കാന്‍ ശ്രമിക്കുന്നവര്‍ ശ്രമം തുടരട്ടെ- ശര്‍മ ഒലി പറഞ്ഞു.
ഇന്ത്യന്‍ പ്രദേശങ്ങളുള്‍പ്പെടുത്തി വിവാദ ഭൂപടം തയാറാക്കുന്നതിനു മുമ്പ് മുന്‍ പ്രധാനമന്ത്രി പ്രചണ്ഡയില്‍ നിന്ന് ശര്‍മ ഒലി കടുത്ത വിമര്‍ശനം നേരിട്ടിരുന്നു. ഇരുവരും തമ്മിലെ ശത്രുത രൂക്ഷമായതിനാല്‍ വെള്ളിയാഴ്ച നടന്ന സ്റ്റാന്റിങ് കമ്മിറ്റി യോഗത്തില്‍ ഒലി പങ്കെടുത്തിരുന്നില്ല.
44 അംഗ കമ്മിറ്റിയിലെ 30 പേരും പ്രചണ്ഡയ്‌ക്കൊപ്പമായതിനാല്‍ ഒലി സര്‍ക്കാര്‍ കടുത്ത ഭീഷണി നേരിടുകയാണ്. കൊവിഡ് പ്രതിരോധം പാളിയതിനും ഒലി വിമര്‍ശനം നേരിട്ടിരുന്നു.