മലപ്പുറം: കരിപ്പൂര്‍ വിമാനത്താവളത്തെ തകര്‍ക്കാന്‍ ഭരണകൂടവും ഉദ്യോഗസ്ഥരും നടത്തുന്ന ഗൂഡാലോചനക്കെതിരേ മുസ്‌ലിം ലീഗ് ബഹുജന പ്രക്ഷോഭം സംഘടിപ്പിക്കും. പ്രസിഡന്റ് സയ്യിദ് സാദിഖലി ശിഹാബ് തങ്ങളുടെ അധ്യക്ഷതയില്‍ ചേര്‍ന്ന യോഗം 30ന് വൈകിട്ട് മൂന്നിന് കരിപ്പൂര്‍ എയര്‍പോര്‍ട്ട് സംരക്ഷണ മാര്‍ച്ച് സംഘടിപ്പിക്കുന്നതിന് തീരുമാനിച്ചു. കൊളത്തൂര്‍ വിമാനത്താവള ജങ്ഷനില്‍നിന്ന് മാര്‍ച്ച് ആരംഭിക്കും. തുടര്‍ന്ന് വിമാനത്താവളത്തെ തകര്‍ക്കാനുള്ള ഗൂഡാലോചനക്കെതിരേ ബഹുജന പ്രതിഷേധ സംഗമം നടത്തും.
ജില്ലാതല നേതൃയോഗത്തില്‍ എം.പിമാരായ പി.കെ കുഞ്ഞാലിക്കുട്ടി, ഇ.ടി മുഹമ്മദ് ബഷീര്‍, പി.വി അബ്ദുല്‍ വഹാബ്, പി. അബ്ദുല്‍ ഹമീദ് എം.എല്‍.എ, ജില്ലാ കമ്മിറ്റി ഭാരവാഹികളായ അഡ്വ. യു.എ ലത്വീഫ്, കൊളത്തൂര്‍ ടി. മുഹമ്മദ് മൗലവി, അഷ്‌റഫ് കോക്കൂര്‍, എം.എ ഖാദര്‍, സി. മുഹമ്മദാലി, പി.എ റഷീദ്, എം. അബ്ദുല്ലക്കുട്ടി, ഉമ്മര്‍ അറക്കല്‍, ഇസ്മാഈല്‍ മൂത്തേടം, കെ.എം ഗഫൂര്‍, നൗഷാദ് മണ്ണിശ്ശേരി, പി.കെ.സി അബ്ദുറഹ്മാന്‍, പി.പി സഫറുല്ല സംസാരിച്ചു.