റിയാദ്: തീര്‍ത്ഥാടക വേഷത്തില്‍ ജിദ്ദ വിമാനത്താവളത്തിലൂടെ മയക്കു മരുന്ന് കടത്താന്‍ ശ്രമിച്ച ഏഷ്യന്‍ യുവാവിനെ കസ്റ്റംസ് വിഭാഗം പിടികൂടി. ജിദ്ദ കിംഗ് അബ്ദുള്‍ അസീസ് വിമാനത്താവളം വഴി മയക്കുമരുന്നിന് ശ്രമിച്ച തീര്‍ഥാടകനെയാണ് അധികൃതര്‍ പിടികൂടിയത്. ഉംറക്കായുള്ള ഇഹ്‌റാം വേഷത്തില്‍ എത്തിയ ഇയാളുടെ ശരീരത്തിനകത്തു ക്യാപ്‌സൂള്‍ രൂപത്തില്‍ മയക്കു മരുന്ന് ഒളിപ്പിച്ച നിലയില്‍ പിടികൂടുകയായിരുന്നു. സംശയം തോന്നി നടത്തിയ എക്‌സ്‌റേ പരിശോധനയിലാണ് ശരീരത്തിനകത്ത് ക്യാപ്‌സ്യൂള്‍ കണ്ടെത്തിയത്.

തുടര്‍ന്നു എയര്‍പോര്‍ട്ടിലെ ഡ്യൂട്ടി ഡോക്റ്റര്‍ ശ്രമിച്ചെങ്കിലും ഇത് പുറത്തെടുക്കാന്‍ സാധിച്ചില്ല. ഇതിനിടയില്‍ ഇയാളുടെ നില വഷളായതിനെ തുടര്‍ന്ന് കിംഗ് ഫഹദ് ആശുപത്രിയിലേക്ക് മാറ്റി. ശേഷം ഇയാളുടെ ശരീരത്തില്‍ നിന്നും 40 ക്യാപ്‌സ്യൂളുകള്‍ പുറത്തെടുക്കുകയായിരുന്നു. ഇത്രയും ക്യാപ്‌സൂളുകളിലായി അരക്കിലോ ഹെറോയിനായാണ് കണ്ടെത്തിയത്. പിടികൂടിയ ഇയാളെ തുടര്‍നടപടികള്‍ക്കായി ബന്ധപ്പെട്ട അധികൃതര്‍ക്ക് കൈമാറി.