ശ്രീനഗര്‍: അനന്ത്‌നാഗ് ജില്ലയിലുണ്ടായ ഏറ്റുമുട്ടലില്‍ മൂന്ന് തീവ്രവാദികളെ കൊലപ്പെടുത്തിയെന്ന് സുരക്ഷാ സേന. ഹിസ്ബുല്‍ മുജാഹിദീന്‍ കമാന്‍ഡര്‍ മസൂദ് അഹമ്മദ് ഭട്ട് ഉള്‍പ്പെടെയുള്ളവരാണ് കൊല്ലപ്പെട്ടത്. ദക്ഷിണ കശ്മീരിലെ ഖുച്ഛോഹാര്‍ മേഖലയിലാണ് ഏറ്റുമുട്ടലുണ്ടായത്.

മസൂദിന്റെ വധത്തോടെ ജമ്മു മേഖലയില്‍ ദോഡ ജില്ല തീവ്രവാദ മുക്തമായെന്ന് പൊലിസ് പ്രഖ്യാപിച്ചു. അവസാന തീവ്രവാദിയും കൊല്ലപ്പെട്ടെന്നും പൊലിസ് പറഞ്ഞു.

'മസൂദ് ബലാത്സംഗക്കേസില്‍ ഉള്‍പ്പെടുകയും ഒളിവില്‍ പോവുകയും ചെയ്തു. പിന്നീട് ഹിസ്ബുല്‍ മുജാഹിദീനില്‍ ചേര്‍ന്ന ഇയാള്‍ കശ്മീരിലേക്ക് പ്രവര്‍ത്തനം മാറ്റി'- ജമ്മു കശ്മീര്‍ പൊലിസ് മേധാവി ദില്‍ബാഗ് സിങ് പറഞ്ഞു.

ദക്ഷിണ കശ്മീരില്‍ 29 വിദേശ തീവ്രവാദികള്‍ സജീവമായി പ്രവര്‍ത്തിക്കുന്നുണ്ടെന്ന് ജമ്മു കശ്മീര്‍ പൊലിസ് ശനിയാഴ്ച പറഞ്ഞിരുന്നു.