മനാമ: യു.എ.ഇ സന്ദര്‍ശിക്കുന്ന ജി.സി.സി രാഷ്ട്രങ്ങളിലെ സന്ദര്‍ശകര്‍ക്ക് വിസ ലഭ്യമാക്കുന്ന കാര്യത്തില്‍ ഇന്നു മുതല്‍ മാറ്റം. ഇതിന്റെ ഭാഗമായി നിലവിലുള്ള ഓണ്‍ അറൈവല്‍ വിസ സൗകര്യം ഇന്നു മുതല്‍ നിര്‍ത്തലാക്കും. പകരം യു.എ.ഇ സന്ദര്‍ശിക്കാന്‍ വിദേശികളടക്കമുള്ള മുഴുവന്‍ ജി.സി.സി സന്ദര്‍ശകര്‍ക്കും ഇ വിസ നിര്‍ബന്ധമാക്കി.
നേരത്തെ ഓണ്‍ അറൈവല്‍ വിസ സൗകര്യം ഉപയോഗപ്പെടുത്തി ജി.സി.സി രാഷ്ട്രങ്ങളിലുള്ളവര്‍ക്ക് എപ്പോഴും രാജ്യം സന്ദര്‍ശിക്കാന്‍ അനുമതിയുണ്ടായിരുന്നു. ചില പ്രത്യേക തസ്തികകളില്‍ ജോലി ചെയ്യുന്നവര്‍ക്ക് പാസ്‌പോര്‍ട്ട് ഉപയോഗിച്ച് മാത്രം ഏതു സമയത്തും അതിര്‍ത്തി കടക്കാമായിരുന്നു. കൂടാതെ എയര്‍ പോര്‍ട്ട് വഴിയുള്ള ജി.സി.സിയിലെ യാത്രക്കാര്‍ക്ക് യു.എ.ഇ എയര്‍പോര്‍ട്ടിലെത്തുന്നതോടെ ഓണ്‍അറൈവല്‍ വിസ പാസ്‌പോര്‍ട്ടില്‍ സ്റ്റാംപ് ചെയ്ത് നല്‍കുകയും ചെയ്തിരുന്നു. ഈ സംവിധാനമാണ് ഇന്നു മുതല്‍ നിര്‍ത്തലാക്കിയത്. അതേസമയം ജി.സി.സി രാഷ്ട്രങ്ങളില്‍ ഉള്‍പ്പെടാത്ത 46 രാജ്യങ്ങളിലുള്ളവര്‍ക്ക് വിസ ഓണ്‍ അറൈവല്‍ സംവിധാനം തുടര്‍ന്നും ലഭ്യമാകും.