റിയാദ്:ഒരു വര്‍ഷം മുമ്പ് ഇറാഖില്‍ സായുധസംഘം തട്ടിക്കൊണ്ടുപോയി കഴിഞ്ഞ ദിവസം വിട്ടയച്ച 26 ഖത്തരികളുടെ കൂട്ടത്തില്‍ രണ്ടു സഊദി പൗരന്മാരെയും വിട്ടയച്ചു. ഖത്തര്‍ സംഘത്തോടൊപ്പം വിട്ടയയ്ക്കപ്പെട്ട ഇവര്‍ സഊദിയില്‍ എത്തിച്ചേര്‍ന്നുവെന്ന് ആഭ്യന്തര മന്ത്രാലയം പറഞ്ഞു. സംഘത്തോടൊപ്പം ഉള്‍പ്പെട്ടിരുന്ന സഊദി പൗരന്മാരായ സലിം അബ്ദുല്‍ ഹാദി അല്‍ മരി, മുഹമ്മദ് അബ്ദുല്ല അല്‍ മരി എന്നിവരാണ് സഊദിയില്‍ തിരിച്ചെത്തിയത്. ഖത്തര്‍ സംഘത്തോടൊപ്പം തട്ടിക്കൊണ്ടുപോയ ഇവരെ കണ്ടെത്തുന്നതിനും സ്വദേശങ്ങളിലേക്ക് അയക്കുന്നതിനും നേതൃത്വം നല്‍കിയ ഇറാഖ് ഗവണ്‍മെന്റിനെയും പ്രധാനമന്ത്രി ഡോ: ഹൈദര്‍ അബാദിയെയും സഊദി അറേബ്യ പ്രശംസിച്ചു.

[caption id="attachment_305878" align="alignnone" width="620"] മോചിപ്പിച്ച സഊദികളെ സ്വീകരിച്ചു കൊണ്ട് വരുന്നു[/caption]

പതിനാറു മാസം മുമ്പ് 2015 ഡിസംബറിലാണ് സഊദി-ഇറാഖ് അതിര്‍ത്തിക്കു സമീപം ഇറാഖ് പ്രദേശത്തു നായാട്ട് യാത്രക്കിടെ ഖത്തരികളെയും അതിലുള്‍പ്പെട്ട സഊദികളെയും സായുധ സംഘം തട്ടിക്കൊണ്ടുപോയത്. ഇവരുടെ മോചന ചര്‍ച്ചകള്‍ക്ക് ഖത്തര്‍ സംഘം ദിവസങ്ങള്‍ക്കു മുമ്പ് ബഗ്ദാദിലെത്തിയിരുന്നു. ബന്ദികളുടെ മോചനത്തിന് ഖത്തര്‍ 100 കോടി ഡോളര്‍ കൈമാറിയതായി റിപ്പോര്‍ട്ടുണ്ട്. സംഘത്തില്‍ ഉള്‍പ്പെട്ട ഖത്തര്‍ രാജകുടുംബാംഗത്തെയും ഒരു പാകിസ്താനിയെയും കഴിഞ്ഞ വര്‍ഷം ഏപ്രിലില്‍ റാഞ്ചികള്‍ വിട്ടയച്ചിരുന്നു. ഇറാഖ് ആഭ്യന്തര മന്ത്രാലയത്തില്‍ നിന്നുള്ള ലൈസന്‍സോടെയാണ് സംഘം നായാട്ടിന് ഇറാഖില്‍ പ്രവേശിച്ചിരുന്നത്. ബന്ദികളുടെ മോചനത്തിന് ഖത്തര്‍ ഇറാഖിനു മേല്‍ സമ്മര്‍ദ്ദം ചെലുത്തിവരികയായിരുന്നു.