ഇരിട്ടി: ഇരിട്ടി ആസ്ഥാനമായി മിനി സിവില്‍ സ്‌റ്റേഷന്‍ നിര്‍മിിക്കാന്‍ നടപടി സ്വികരിക്കണമെന്ന് ഇരിട്ടി താലൂക്ക് വികസന സമിതിയോഗം ആവശ്യപ്പെട്ടു. താലൂക്ക് ആസ്ഥാനമായ ഇരിട്ടിയിലെ വാടകകെട്ടിടത്തില്‍ പ്രവര്‍ത്തിക്കുന്ന മുഴുവന്‍ സര്‍ക്കാര്‍ ഓഫിസുകളും ഒരു കുടക്കീഴില്‍ കൊണ്ടു വരുന്നതിന് മിനി സിവില്‍ സ്‌റ്റേഷന്‍ അനിവാര്യമാണെന്ന് യോഗം ആഭിപ്രായപ്പെട്ടു. മുസ്‌ലിംലീഗ് പ്രതിനിധി ഇബ്രാഹിം മുണ്ടേരിയാണ് വിഷയം യോഗത്തില്‍ ഉന്നയിച്ചത്. മഴയില്‍ ഏറ്റവും കൂടുതല്‍ നാശം നേരിട്ടത് ഇരിട്ടി താലൂക്കിലാണെന്നും 18 വീടുകള്‍ പൂര്‍ണ്ണമായും 100 ലധികം വീടുകള്‍ ഭാഗികമായും തകര്‍ന്നിട്ടുണ്ടെന്നും ദുരിതബാധിതര്‍ക്ക് ആദ്യഘട്ട സഹായമായി 19,42,770 രൂപ അനുവദിച്ച് സര്‍ക്കാര്‍ ഉത്തരവായതായും ഉടന്‍ പണം നല്‍കുമെന്നും തഹസില്‍ദാര്‍ കെ.കെ.ദിവാകരന്‍ യോഗത്തെ അറിയിച്ചു. യോഗത്തില്‍ പേരാവൂര്‍ പഞ്ചായത്ത് പ്രസിഡന്റ് ജിജിജോയ് അധ്യക്ഷനായി. അയ്യങ്കുന്ന് പഞ്ചായത്ത് വൈസ് പ്രസിഡന്റ് തോമസ് വലിയതൊട്ടി, കണിച്ചാര്‍ പഞ്ചായത്ത് പ്രസിഡന്റ് സലീന്‍ മാണി, വി.വി ചന്ദ്രന്‍ സംസാരിച്ചു.