ദോഹ: ഇന്ത്യന്‍ പ്രവാസികള്‍ക്ക് സര്‍ട്ടിഫിക്കറ്റുകളുടെ അറസ്റ്റേഷനായി ഇന്ത്യന്‍ കള്‍ച്ചറല്‍ സെന്ററില്‍(ഐസിസി) സൗകര്യമൊരുക്കുന്നു. ഏപ്രില്‍ ആറ് ശനി മുതല്‍ അറ്റസ്റ്റേഷനായുള്ള സര്‍ട്ടിഫിക്കേറ്റുകളും രേഖകളും ഐസിസിയില്‍ സമര്‍പ്പിക്കാം. എല്ലാ ശനിയാഴ്ചകളിലും രാവിലെ ഒന്‍പതു മുതല്‍ പന്ത്രണ്ട് മണിവരെ ഈ സേവനം ലഭ്യമായിരിക്കും. ഇതിനായി പ്രത്യേക ജീവനക്കാരെ ഐസിസിയില്‍ നിയോഗിക്കും. താല്‍ക്കാലികാടിസ്ഥാനത്തിലാണ് ഈ സേവനം ഐസിസിയില്‍ ലഭ്യമാക്കുന്നത്. ഏതു സമയത്തും മുന്‍കൂര്‍ നോട്ടീസോ അറിയിപ്പോ കൂടാതെ തന്നെ ഈ സൗകര്യം റദ്ദാക്കപ്പെടാമെന്ന് ഇന്ത്യന്‍ എംബസിയുടെ ഹെഡ് ഓഫ് മിഷന്‍ അറിയിച്ചു. അബുഹമൂറിലാണ് ഇന്ത്യന്‍ കള്‍ച്ചറല്‍ സെന്റര്‍. ഇന്ത്യന്‍ പ്രവാസികളെ സംബന്ധിച്ചിടത്തോളം ഏറെ ആശ്വാസകരവും പ്രയോജനകരവുമാണ് ഈ തീരുമാനം. നേരത്തെ സര്‍ട്ടിഫിക്കറ്റുകളുടെ അറ്റസ്റ്റേഷനായി വെസ്റ്റ്‌ബേയിലെ ഇന്ത്യന്‍ എംബസി വരെ പോകണമായിരുന്നു. ഏപ്രില്‍ ആറു മുതല്‍ ശനിയാഴ്ചകളില്‍ ഐസിസിയില്‍ ഇതിനുള്ള സൗകര്യമുണ്ടായിരിക്കും. നവജാത ശിശുക്കളുടെയും കുട്ടികളുടെയും പാസ്‌പോര്‍ട്ടിനായി പ്രവാസികള്‍ക്ക് ഇന്ത്യന്‍ കള്‍ച്ചറല്‍ സെന്ററില്‍(ഐസിസി) അപേക്ഷ നല്‍കാമെന്ന് ഇന്ത്യന്‍ എംബസി നേരത്തെ അറിയിച്ചിരുന്നു. മാര്‍ച്ച് പന്ത്രണ്ടു മുതല്‍ തീരുമാനം പ്രാബല്യത്തിലാകുകയും ചെയ്തു