ജനപ്രിയ മെസേജിങ് സര്‍വീസായ വാട്‌സ്ആപ്പ് ചില ഫോണുകളില്‍ സേവനം അവസാനിപ്പിക്കുമെന്ന് നേരത്തെ റിപ്പോര്‍ട്ടുകള്‍ വന്നിരുന്നു. ഇപ്പോഴിതാ അതിന്റെ സമയവും അവര്‍ വ്യക്തമാക്കിയിരിക്കുകയാണ്. ഈ വര്‍ഷം അവസാനത്തോടെ വിന്‍ഡോസ്, ആന്‍ഡ്രോയിഡ്, ഐഒഎസ് എന്നിവയുടെ പഴയ പതിപ്പുകളില്‍ പ്രവര്‍ത്തിക്കുന്ന ഫോണുകളില്‍ സേവനം പൂര്‍ണമായും അവസാനിപ്പിക്കുമെന്നാണ് റിപ്പോര്‍ട്ടുകള്‍.

സിംബിയാന്‍- ബ്ലാക്ക്‌ബെറി ഉപയോക്താക്കള്‍ക്ക് 2016 ഡിസംബര്‍ 31 മുതല്‍ വാട്‌സ്ആപ്പ് ഉപയോഗിക്കാന്‍ സാധിക്കില്ലെന്ന സന്ദേശം ലഭിച്ചുതുടങ്ങിയിട്ടുണ്ട്.

ഈ വര്‍ഷം മാര്‍ച്ചോടെ തന്നെ സേവനം അവസാനിപ്പികുകയാണെന്ന വാര്‍ത്ത വന്നിരുന്നു. എന്നാല്‍ ഇപ്പോഴാണ് കൃത്യമായ ദിവസം അറിയിച്ചിരിക്കുന്നത്. സോഫ്റ്റ് വെയര്‍ അപ്‌ഡേറ്റ് ചെയ്യാനെടുക്കുന്ന കാലതാമസമാണ് മേല്‍പറഞ്ഞ ഫോണുകള്‍ക്ക് തിരിച്ചടിയായിരിക്കുന്നത്. വാട്‌സ്ആപ്പ് പുതിയതായി അവതരിപ്പിക്കുന്ന ഫീച്ചറുകള്‍ ഇവയില്‍ ലഭ്യമാക്കാന്‍ കഴിയുന്നില്ല എന്നതും മറ്റൊരു പ്രശ്‌നമാണ്.