ന്യൂഡല്‍ഹി: ഫ്രാന്‍സില്‍ നിന്ന് ആറ് റഫാല്‍ യുദ്ധവിമാനങ്ങള്‍ ജൂലയ് അവസാനത്തോടെ ഇന്ത്യയിലെത്തുമെന്ന് റിപ്പോര്‍ട്ട്. അതിര്‍ത്തിയില്‍ ഇന്ത്യ....ചൈനാ സംഘര്‍ഷാവസ്ഥ നിലനില്‍ക്കുകയും വ്യോമസേന കടുത്ത ജാഗ്രത പാലിക്കുകയും ചെയ്യുന്നതിനിടെയാണ് അത്യാധുനിക യുദ്ധവിമാനങ്ങള്‍ എത്തിക്കുന്നത്. മീറ്റിയോര്‍ എയര്‍ ടു എയര്‍ മിസൈല്‍, സ്‌കാള്‍പ് ക്രൂസ് മിസൈല്‍ എന്നിവ അടങ്ങുന്നതാണ് റഫാല്‍ യുദ്ധവിമാനങ്ങള്‍.
ദീര്‍ഘദൂര എയര്‍ ടു എയര്‍ മിസൈലുകള്‍ കൂടി എത്തുന്നതോടെ വ്യോമസേനയുടെ ആക്രമണശേഷി വന്‍തോതില്‍ വര്‍ധിക്കുമെന്ന് ഇന്ത്യന്‍ വ്യോമസേന അറിയിച്ചു. ഇന്ത്യന്‍ വ്യോമ സേനയുടെ പ്രത്യേക അഭ്യര്‍ഥനയുടെ പ്രകാരമാണ് റഫാല്‍ കൈമാറ്റം ഫ്രാന്‍സ് ത്വരിതപ്പെടുത്തുന്നത്.