കൊല്ലം: പള്ളിത്തോട്ടത്ത് നിന്ന് മത്സ്യബന്ധനത്തിനു പോയ ഫൈബര്‍ വള്ളത്തില്‍ മത്സ്യബന്ധന ബോട്ടിടിച്ച് ഒരു തൊഴിലാളി മരിച്ചു. സംഭവത്തില്‍ രണ്ടുപേര്‍ക്ക് പരുക്കേറ്റു. പള്ളിത്തോട്ടം ഗലീലിയ നഗറില്‍ ബൈജു അലക്‌സാണ്ടര്‍(46)ആണ് മരിച്ചത്. പരുക്കേറ്റ കൊല്ലം സ്വദേശികളായ റെയ്മണ്ട്, ഡാനിയേല്‍ എന്നിവര്‍ ജില്ലാ ആശുപത്രിയില്‍ ചികിത്സയിലാണ്. ഇന്നലെ പുലര്‍ച്ചെ ആറോടെ കരയില്‍ നിന്ന് മൂന്ന് നോട്ടിക്കല്‍ മൈല്‍ അകലെ തീരക്കടലിലായിരുന്നു അപകടം.
പള്ളിത്തോട്ടം സ്വദേശി ഡാനിയലിന്റെ കാണിക്കമാത എന്ന വള്ളമാണ് അപകടത്തില്‍പ്പെട്ടത്. വള്ളത്തിലിടിച്ച ബോട്ട് നിര്‍ത്താതെ പോയി. ഇടിയുടെ ആഘാതത്തില്‍ തകര്‍ന്ന വള്ളത്തില്‍ നിന്നും കടലിലേക്ക് തെറിച്ചു വീണ ബൈജു സംഭവസ്ഥലത്തു വച്ചുതന്നെ മരിച്ചു. തകര്‍ന്ന വള്ളത്തില്‍ നിന്നും കടലില്‍ വീണ റെയ്മണ്ട്, ഡാനിയേല്‍ എന്നിവരെ അരമണിക്കൂറിന് ശേഷം മറ്റൊരു ബോട്ട് രക്ഷപ്പെടുത്തുകയായിരുന്നു. സംഭവത്തില്‍ പള്ളിത്തോട്ടം പൊലിസ് കേസെടുത്തു. ബോട്ടിനായി കോസ്റ്റല്‍ പൊലിസ് അന്വേഷണം ആരംഭിച്ചിട്ടുണ്ട്. തങ്കശ്ശേരി ലൈറ്റ് ഹൗസിലെ സി.സി ടി.വി ദൃശ്യങ്ങള്‍ പൊലിസ് പരിശോധിക്കും.