മാഡ്രിഡ്: ലോക്ക്ഡൗണിനു ശേഷം തുടര്‍ന്ന ലാലിഗയില്‍ റയല്‍ മാഡ്രിഡ് അപരാജിതക്കുതിപ്പ് തുടര്‍ന്നതോടെ അതുവരെ ബാഴ്‌സ കൈയടക്കി വച്ച ലീഗിലെ ഒന്നാം സ്ഥാനപ്പട്ടം തിരിച്ചുപിടിച്ച് റയല്‍ മാഡ്രിഡ്. ഇന്നലെ എസ്പ്യാനോളിനെ ഒരു ഗോളിന് വീഴ്ത്തിയാണ് സിദാന്റെ അരുമശിഷ്യര്‍ വീണ്ടും വിജയഭേരി മുഴക്കിയത്.
ലോക്ക്ഡൗണിനു ശേഷമുള്ള റയലിന്റെ തുടര്‍ച്ചയായ അഞ്ചാം ജയമാണിത്. കളിച്ച അഞ്ചിലും ജയം. ജയത്തോടെ ചാംപ്യന്‍സ് ലീഗ് യോഗ്യത ഉറപ്പിക്കാനും അവര്‍ക്കായി. സൂപ്പര്‍ താരം കരിം ബെന്‍സേമയുടെ ഉഗ്രനൊരു അസിസ്റ്റാണ് റയലിന്റെ വിജയത്തിന് ചുക്കാന്‍ പിടിച്ചത്. താരത്തിന്റെ അസിസ്റ്റില്‍ കാസമിറോ ഗോള്‍ നേടുകയും ചെയ്തു.
എവേ മത്സരത്തില്‍ ആദ്യ പകുതിയുടെ അധിക സമയത്ത് ബെന്‍സേമയുടെ തന്ത്രപൂര്‍വുമുള്ള ബാക്ക്ഹീല്‍ പാസ് റയലിന് അഞ്ചാം ജയം സമ്മാനിച്ചു. കടുത്ത പോരാട്ടം കാഴ്ചവച്ച എസ്പാന്യോളിന് ഫിനിഷിങ്ങിലെ പോരായ്മയാണ് പലപ്പോഴും വിനയായത്.
ജയത്തോടെ 32 മത്സരങ്ങളില്‍നിന്ന് റയലിന് 71 പോയിന്റായി. രണ്ടാമതുള്ള ബാഴ്‌സയ്ക്ക് 32 കളികളില്‍ നിന്ന് 69 പോയിന്റുണ്ട്. ലീഗിലെ മറ്റു മത്സരങ്ങളില്‍ അത്‌ലറ്റിക്കോ മാഡ്രിഡ് അലാവസിനെയും (2-1), എയ്ബര്‍ ഗ്രനേഡയെയും (2-1) വിയ്യാറയല്‍ വലന്‍സിയയേയും (2-0), ലെവാന്റെ ബെറ്റിസിനെയും (4-2) പരാജയപ്പെടുത്തി.