ഡാര്‍ജിലിംഗ്: രാഷ്ട്രപതിയുടെ വാഹനവ്യൂഹത്തിലെ കാര്‍ മലയിടുക്കിലേക്ക് മറിഞ്ഞ് അഞ്ചു പേര്‍ക്ക് പരുക്ക്. വെള്ളിയാഴ്ച്ച രാവിലെയാണ് അപകടം നടന്നത്. രാഷ്ട്രപതി സുരക്ഷിതനാണ്. ഡല്‍ഹിയിലേക്ക് പോകാന്‍ ബഗ്‌ഡോഗ്രയിലെ വിമാനത്താവളത്തിലേക്ക് പോവുകയായിരുന്നു രാഷ്ര്പതി. 

ഡാര്‍ജിലിങില്‍ നിന്ന് 30 കിലോമീറ്റര്‍ അകലെയാണ് അപകടം സംഭവിച്ചത്. രാഷ്ട്രപതി പ്രണബ് മുഖര്‍ജി സഞ്ചരിച്ചിരുന്ന വാഹനത്തിന് പിറകിലുള്ള മൂന്നാമത്തെ എസ്‌കോര്‍ട്ട് കാര്‍ തെന്നി മറിയുകയായിരുന്നുവെന്ന് പൊലിസ് പറഞ്ഞു. കാറിലുണ്ടായിരുന്ന സുരക്ഷാ ഉദ്യോഗസ്ഥര്‍ക്കാണ് പരുക്കേറ്റത്. ഇവരെ ഡാര്‍ജിലിങിലെ സ്വകാര്യ ആശുപത്രിയില്‍ പ്രവേശിപ്പിച്ചു.

രാഷ്ട്രപതിയോടൊപ്പം ബംഗാള്‍ മുഖ്യമന്ത്രി മമതാ ബാനര്‍ജിയും കാറിലുണ്ടായിരുന്നു. കനത്ത മഞ്ഞും മഴയും ഉള്ളതുകൊണ്ടാണ് ഈ മേഖലയില്‍ ഹെലികോപ്റ്റര്‍ യാത്ര ഒഴിവാക്കിയത്.