ആലപ്പുഴ: കലക്ടറേറ്റില്‍ കൊച്ചുകുഞ്ഞുങ്ങളുമായി എത്തുന്ന അമ്മമാര്‍ക്ക് ആശ്വാസമേകി മുലയൂട്ടല്‍ കേന്ദ്രം തുടങ്ങി. ഇന്നര്‍വീല്‍ ക്ലബ് ഓഫ് ആലപ്പിയാണ് പോര്‍ട്ടബിള്‍ മുലയൂട്ട് കേന്ദ്രം സ്ഥാപിച്ചത്. ജില്ലാ കലക്ടര്‍ എസ്. സുഹാസ് മുലയൂട്ടല്‍ കേന്ദ്രത്തിന്റെ ഉദ്ഘാടനം നിര്‍വഹിച്ചു. കളക്ടറേറ്റിലെ സ്റ്റാഫ് കൗണ്‍സിലുമായി സഹകരിച്ചാണ് പദ്ധതി നടപ്പാക്കിയത്. കലക്ടറെ കാണാനെത്തുവര്‍ക്കുള്ള ഇരിപ്പിടത്തിന് സമീപമാണ് മുലയൂട്ടല്‍ കേന്ദ്രം സ്ഥാപിച്ചിട്ടുള്ളത്.
ഇതിനോടനുബന്ധിച്ച് നടന്ന യോഗത്തില്‍ ഇന്നര്‍വീല്‍ പ്രസിഡന്റ് ആനി ബോബന്‍ അധ്യക്ഷത വഹിച്ചു. സംഘടനയുടെ സേ നോ റ്റു പ്ലാസ്റ്റിക് പദ്ധതി മുഖ്യാതിഥിയായി എത്തിയ സിനിമാ താരം മല്ലിക സുകുമാരന്‍ ഉദ്ഘാടനം ചെയ്തു. എ.ഡി.എം. ഐ അബ്ദുള്‍ സലാം, ഡാര്‍ളി സജി, പത്മജ നമ്പൂതിരി, സിസിലി ജോണ്‍, സ്റ്റാഫ് കൗണ്‍സില്‍ സെക്രട്ടറി വിനോദ് ജോണ്‍ സംസാരിച്ചു.