വാരണാസി: ബനാറസ് ഹിന്ദു സര്‍വകലാശാലയില്‍ വിദ്യാര്‍ഥി വെടിയേറ്റ് മരിച്ചു. 2017ല്‍ കാമ്പസിലുണ്ടായ ചില അക്രമങ്ങളുമായി ബന്ധപ്പെട്ട് സസ്‌പെന്‍ഡ് ചെയ്യപ്പെട്ട ഗൗരവ് സിങ് ആണ് അജ്ഞാതരായ സംഘത്തിന്റെ വെടിയേറ്റ് മരിച്ചത്.
കാമ്പസിലെ ഹോസ്റ്റലിന് പുറത്തുവച്ചാണ് ഇയാള്‍ക്ക് വെടിയേറ്റതെന്ന് പൊലിസ് അറിയിച്ചു. വയറിന് വെടിയേറ്റനിലയില്‍ ഇയാളെ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. സംഭവത്തില്‍ ഹോസ്റ്റലിന്റെ സുരക്ഷാ ചുമതലയിലുള്ള റൊയാന സിങ് ഉള്‍പെടെ നാലുപേര്‍ക്കെതിരേ എഫ്.ഐ.ആര്‍ രജിസ്റ്റര്‍ ചെയ്തിട്ടുണ്ട്. സര്‍വകലാശാലാ കാമ്പസിലെ ലാല്‍ബഹാദൂര്‍ ശാസ്ത്രി ഹോസ്റ്റലിലായിരുന്നു ഗൗരവ് സിങ് താമസിച്ചിരുന്നത്. എന്നാല്‍ ആക്രമണ സമയത്ത് സുഹൃത്തിനൊപ്പം ബിര്‍ള ഹോസ്്റ്റലിന് പുറത്ത് നില്‍ക്കുകയായിരുന്നു. അക്രമികള്‍ ബൈക്കിലെത്തിയാണ് ഇയാള്‍ക്കെതിരേ വെടിയുതിര്‍ത്തത്.