അടിമാലി: അധികൃതരുടെ അനാസ്ഥയില്‍ ലക്ഷങ്ങള്‍ മുടക്കി നിര്‍മ്മിച്ച കൃഷിവകുപ്പ് കെട്ടിടം കാടുകയറി നാശിക്കുന്നു. കഴിഞ്ഞ വര്‍ഷം ലക്ഷങ്ങള്‍ മുടക്കി നവീകരിച്ചിട്ടും കെട്ടിടം ഉപയോഗ ശൂന്യമായി കിടക്കുകയാണ്.
കാടുമൂടിയ കെട്ടിടം ഇന്ന് മദ്യപ സംഘങ്ങളുടെ താവളമായി മാറി. 1985 ല്‍ രാജാക്കാട് കൃഷി ഓഫീസിന് വേണ്ടി പണികഴിപ്പിച്ച കെട്ടിടമാണ് ഇത്. ഇവിടെ ഓഫീസ് പ്രവര്‍ത്തിച്ച് വന്നിരുന്നതുമാണ്. കൃഷി ഓഫീസിന്റെ പ്രവര്‍ത്തനം ഈ കെട്ടിടത്തില്‍ നിന്നും പഞ്ചായത്ത് ഓഫീസിന്റെ സമീപത്തേയ്ക്ക് മാറ്റിയതോടെയാണ് കെട്ടിടം അനാഥമായത്. ആളുകള്‍ക്ക് ഇടപാടുകള്‍ക്കായി എത്തുന്നതിന് ബുദ്ധിമുട്ട് നേരിടുന്നു എന്ന കാരണം പറഞ്ഞാണ് ഓഫീസിന്റെ പ്രവര്‍ത്തനം ടൗണിലേയ്ക്ക് മാറ്റിയത്. എന്നാല്‍ ഇതിന് ശേഷം ഇവിടെ മറ്റെന്തെങ്കിലും സംരംഭം ആരംഭിക്കുന്നതിനോ കെട്ടിടം സംരക്ഷിക്കുന്നതിനോ അധികൃതര്‍ നടപടി സ്വീകരിച്ചില്ല. പഞ്ചായത്ത് ലക്ഷക്കണക്കിന് രൂപാ മുടക്കി കെട്ടിടത്തിന്റെ മേല്‍ക്കൂര കോണ്‍ക്രീറ്റ് ചെയ്യുകയും ചുറ്റുമതില്‍ നിര്‍മ്മിക്കുകയും ചെയ്തു. മാത്രവുമല്ല ടൗണില്‍ നിന്നും മാറി സ്ഥിതിചെയ്യുന്ന കെട്ടിടം രാത്രിയായാല്‍ മദ്യപ സംഘങ്ങളും സാമൂഹ്യ വിരുദ്ധന്മാരും കൈയടക്കുന്ന അവസ്ഥയാണുള്ളതെന്ന് നാട്ടുകാര്‍ തന്നെ പറയുന്നു. കെട്ടിടം സംരക്ഷിക്കുകയും ഒപ്പം സാമൂഹ്യ വിരുദ്ധ ശല്യത്തിന് പരിഹാരം കാണുന്നതിനും നടപടി സ്വീകരിക്കണമെന്നതാണ് നാട്ടുകാരുടെ ആവശ്യം.