റിയാദ്: രാജ്യത്തെ ബോണ്ട് വില്‍പനക്കായി അന്താരാഷ്ട്ര ബാങ്കുകളുമായി ധാരണയിലെത്തി. ലോകത്തെ വിവിധ രാജ്യങ്ങളിലെ പ്രമുഖ ആറു അന്താരാഷ്ട്ര കമ്പനികളുമായി ബോണ്ട് വില്‍പനക്കുള്ള കൂടുതല്‍ ചര്‍ച്ചകള്‍ ഈ മാസം തന്നെ ആരംഭിക്കുമെന്നാണറിയുന്നത്.
          ബാങ്ക് ഓഫ് ചൈന ലിമിറ്റഡ്, ബി.എന്‍.പി പരിബാസ് എസ്.എ, ജര്‍മനി ഡച്ച് ബാങ്ക് എജി, ഗോള്‍ഡ് മാന്‍ സാച്‌സ് ഗ്രൂപ്പ്, മിറ്റ്‌സുബിഷി യു.എഫ്.ജെ ഫിനാന്‍ഷ്യല്‍ ഗ്രൂപ്പ്, മൊര്‍ഗാന്‍ സ്റ്റാന്‍ലി എന്നീ പ്രമുഖ ബാങ്കുകളുമായാണ് ബോണ്ട് വില്‍പനക്കായി പ്രാഥമിക ചര്‍ച്ചകള്‍ നടത്തിയതെന്ന് ബിസിനസ് രംഗത്തെ പ്രമുഖര്‍ വെളിപ്പെടുത്തി. തിരഞ്ഞെടുത്ത ബാങ്കുകളുമായി ഈ മാസം തന്നെ വിശദമായ ചര്‍ച്ചകള്‍ നടത്തുമെന്നാണറിയുന്നത്.

                ജി.സി.സി രാജ്യങ്ങളുടെ നേരത്തെയുള്ള ഏക ആശ്രയമായിരുന്ന എണ്ണ വിപണി കൂപ്പു കുത്തുകയും  താഴ്ന്ന വില തുടരുകയും ചെയ്തതിനെ തുടര്‍ന്നാണ് അറബ് രാജ്യങ്ങളുടെ സാമ്പത്തിക പ്രതിസന്ധി  രൂക്ഷമായത്. ഇതിനെ തുടര്‍ന്നാണ് സഊദിയടക്കമുള്ള പ്രമുഖ രാജ്യങ്ങള്‍ തങ്ങളുടെ ബോണ്ടുകള്‍ വില്‍പനക്ക് വെച്ചിരിക്കുന്നത്.  സഊദി അറേബ്യ 10 ബില്യണ്‍ ഡോളറിന്റെ ആസ്തിയുള്ള ബോണ്ടുകളാണ് വില്‍പനക്ക് വെച്ചിരിക്കുന്നത്.  സഊദി വിഷന്‍ 2030 ന്റെ കീഴില്‍ പ്രഖ്യാപിച്ച ദേശീയ പരിവര്‍ത്തന പദ്ധതി 2020 ആകുമ്പോഴേക്ക് 100 ബില്യണ്‍ ഡോളറിന്റെ നിക്ഷേപം ലക്ഷ്യം വെക്കുകയും സാമ്പത്തിക ലാഭം കിട്ടുന്നതു വരെയായി നിലവിലെ കടം 7. 7 ശതമാനത്തില്‍ നിന്നും 30 ശതമാനമാകുകയും ചെയ്യുമെന്നാണ് കരുതുന്നത്.

               അന്താരാഷ്ട്ര മോണിറ്ററി ഫണ്ടിന്റെ മുന്നറിയിപ്പു പ്രകാരം 2021 അവസാനത്തോടെ ആറു ജി.സി.സി അംഗരാജ്യങ്ങളുടെ കടം 900 ബില്യണ്‍ ഡോളറായി ഉയര്‍ന്നേക്കും. ജി.സി.സി രാജ്യമായ കുവൈത്ത് 9.9 ബില്യണ്‍ ഡോളറിന്റെ ബോണ്ടുകള്‍ വില്‍പനക്കായി നീക്കിയിട്ടുണ്ട്. സഊദി അറേബ്യയുടെ ബോണ്ട് വില്‍പന സമയത്ത് തങ്ങളുടെ ബോണ്ടും വില്‍പന നടത്തുമെന്ന് കരുതുന്നതായും കുവൈത്ത് സാമ്പത്തിക മന്ത്രി അനസ് അല്‍ സാലിഹ് വ്യക്തമാക്കി.
           നേരത്തെ ഏപ്രില്‍, മെയ് മാസങ്ങളിലായി ഖത്തര്‍ 9 ബില്യണ്‍ ഡോളറിന്റെയും അബുദാബി 5 ബില്യണ്‍ ഡോളറിന്റെയും ബോണ്ടുകള്‍ വില്‍പന നടത്തിയിരുന്നു. അതേസമയം, സഊദി അറേബ്യയുടെ ബോണ്ട് വില്‍പന സംബന്ധിച്ച് സാമ്പത്തിക മന്ത്രാലയം ഔദ്യോഗിക വിശദീകരണം ഇതു വരെ പുറത്തുവിട്ടിട്ടില്ല.