ആലപ്പുഴ: കൊവിഡ് ബാധിച്ച് ആലപ്പുഴ സ്വദേശികളായ മൂന്നു പേര്‍ സഊദിയില്‍ മരിച്ചു. കായംകുളം ചിറക്കടവം പാലത്തിന്‍കീഴില്‍ പി.എസ്.രാജീവ് (53), ചാരുംമൂട് ചുനക്കര തെക്ക്തടത്തില്‍ കിഴക്കതില്‍ സൈനുദ്ദീന്‍ (47),
തൃക്കുന്നപ്പുഴ പാനൂര്‍ സ്വദേശി കുന്നച്ചംപറമ്പില്‍ മുഹമ്മദ് റഊഫ് (55) എന്നിവരാണ് ദമാമില്‍ മരിച്ചത്.
രണ്ടാഴ്ച മുന്‍പാണ് രാജീവിനെ കടുത്ത പനിയും ശ്വാസതടസവും ഉണ്ടായതിനെ തുടര്‍ന്ന് സ്വകാര്യ ആശുപത്രിയില്‍ പ്രവേശിപ്പിച്ചത്. പരിശോധനയില്‍ കൊവിഡ് പോസിറ്റീവ് സ്ഥിരീകരിച്ചിരുന്നു.
കഴിഞ്ഞ ദിവസം അസുഖം മൂര്‍ച്ഛിച്ചതോടെ ദമാം മെറ്റെണിറ്റി ആശുപത്രി തീവ്രപരിചരണ വിഭാഗത്തില്‍ വെന്റിലേറ്ററില്‍ പ്രവേശിപ്പിച്ചെങ്കിലും ഇന്നലെ വൈകിട്ടോടെ മരണപ്പെടുകയായിരുന്നു. ബിന്ദു രാജീവാണ് ഭാര്യ. അശ്വിന്‍ രാജ്, കാര്‍ത്തിക് രാജ് എന്നിവര്‍ മക്കളാണ് .
സൈനുദ്ദീന്‍ 20 വര്‍ഷമായി ഗള്‍ഫില്‍ ബിസിനസ് നടത്തുകയായിരുന്നു.
മൂന്നാഴ്ചയായി ആശുപത്രിയില്‍ ചികില്‍സയിലായിരുന്നു. ഭാര്യ: മാജിദ, മക്കള്‍: സല്‍മാന്‍, സഫാന്‍ (ഇരുവരും വിദ്യാര്‍ഥികള്‍).
ദമാമിലെ പെട്രോള്‍ പമ്പ് ജീവനക്കാരനായ അബ്ദുള്‍ റഊഫ് രോഗബാധിതനായി ഖത്വഫ് സെന്‍ട്രല്‍ ഹോസ്പിറ്റലില്‍ ചികിത്സയിലിരിക്കെയാണ് മരണം. ഭാര്യ: ബെന്‍സിറ. മക്കള്‍: ആമിന, സഫിയ, ആയിഷ (മൂവരും വിദ്യാര്‍ഥികള്‍). പാനൂര്‍ കുന്നച്ചംപറമ്പില്‍ പരേതരായ മുഹമ്മദ് സ്വാലിഹ് ലബ്ബയുടെയും സഫിയാ ബീവിയുടെയും മകനാണ്. 30 വര്‍ഷമായി ദമാമില്‍ ജോലി ചെയ്യുന്ന അബ്ദുള്‍ റഊഫ് ഒരുവര്‍ഷം മുന്‍പാണ് നാട്ടില്‍ വന്നുപോയത്. ഇപ്പോള്‍ നാട്ടില്‍ വരാനുള്ള തയാറെടുപ്പ് നടത്തുന്നതിനിടെയാണ് മരണം.