കൊച്ചി: എം.സി ജോസഫൈനെ വനിതാ കമ്മിഷന്‍ ചെയര്‍പേഴ്‌സണ്‍ സ്ഥാനത്തുനിന്ന് പുറത്താക്കണമെന്നാവശ്യപ്പെട്ട് ബി.ജെ.പി നേതാവ് ബി. രാധാകൃഷ്ണ മേനോന്‍ നല്‍കിയ ഹരജി ഹൈക്കോടതി തള്ളി.
ഹരജി 10,000 രൂപ ചെലവ് സഹിതമാണ് തള്ളിയത്. ചീഫ് ജസ്റ്റിസ് എസ്. മണികുമാര്‍, ജസ്റ്റിസ് ഷാജി പി. ചാലി എന്നിവര്‍ അടങ്ങിയ ബെഞ്ചാണ് ഹരജി തള്ളിയത്. നേരത്തെ കോണ്‍ഗ്രസ് നേതാവ് ലതിക സുഭാഷും ഇതേ ആവശ്യവുമായി കോടതിയെ സമീപിച്ചിരുന്നു.
നിയമനാധികാരിക്ക് പരാതി നല്‍കാതെ ഹൈക്കോടതിയില്‍ നേരിട്ട് ഹരജി സമര്‍പ്പിച്ചത് വിമര്‍ശനത്തിനിടയാക്കിയിരുന്നു.
ഇതേതുടര്‍ന്ന് വനിതാ കമ്മിഷന്റെ പ്രവര്‍ത്തനങ്ങളില്‍ പരാതിയുള്ളവര്‍ ഉചിതമായ ഫോറത്തെ ബന്ധപ്പെടട്ടെയെന്ന് പറഞ്ഞാണ് ലതികാ സുഭാഷിന്റെ ഹരജി കോടതി തീര്‍പ്പാക്കിയത്.
സി.പി.എം എന്നാല്‍ കോടതിയും പൊലിസുമാണെന്ന് എം.സി ജോസഫൈന്‍ പരാമര്‍ശിച്ചിരുന്നു. ഇത്തരം പരാമര്‍ശം നടത്തിയ ജോസഫൈനെ വനിതാ കമ്മിഷന്‍ അധ്യക്ഷ സ്ഥാനത്തുനിന്ന് പുറത്താക്കണമെന്നാണ് ഹരജിയില്‍ ആവശ്യപ്പെട്ടിരുന്നത്.