തോല്‍പ്പെട്ടി: തിരുനെല്ലിയില്‍ കാട്ടാനശല്ല്യത്തെ തുടര്‍ന്ന് വ്യാപക കൃഷിനാശം. കഴിഞ്ഞ രാത്രിയിലാണ് അരണപ്പാറയില്‍ ഒറ്റയാനിറങ്ങി വ്യാപക കൃഷിനാശം വരുത്തുകയും, വീടുകള്‍ക്കും വാഹനത്തിനും നേരേ ആക്രമണം നടത്തുകയും ചെയ്തത്.
പ്രദേശത്തെ തോട്ടുങ്കല്‍ ചന്ദ്രന്‍, മൊയ്തു, സുന്ദരന്‍, വിനോദ് എന്നിവരുടെ കൃഷിയാണ് ആന നശിപ്പിച്ചത്. പുലര്‍ച്ചെ കട തുറക്കാനായി എത്തിയ സുന്ദരനെ ആക്രമിക്കാനായി ആന ശ്രമിച്ചെങ്കിലും ഇയാള്‍ ഓടി രക്ഷപ്പെട്ടു.
ഇതോടെ ഇയാളുടെ ജീപ്പ് കുത്തി മറിച്ചിട്ടു. അരണപ്പാറ അസീസ്, രാജന്‍ എന്നിവരുടെ വീടുകളും വാട്ടര്‍ ടാങ്കും ആന തകര്‍ത്തു. തോല്‍പ്പെട്ടി നരിക്കല്‍ ഹൈസ്‌കൂള്‍, എല്‍.പി സ്‌കൂള്‍, ലത്തീന്‍ ദേവാലയം എന്നിവയുടെ മതിലുകള്‍ക്കും കേടുപാടുകള്‍ സംഭവിച്ചു. തിരുനെല്ലി പഞ്ചായത്തിന്റെ വിവിധ ഭാഗങ്ങളില്‍ കാട്ടാന ശല്യം രൂക്ഷമായിരിക്കുകയാണെന്നും അടിയന്തിര പരിഹാര നടപടികള്‍ ഉണ്ടാകണമെന്നും നാട്ടുകാര്‍ ആവശ്യപ്പെട്ടു.