ദേശമംഗലം: സുന്നി മഹല്ല് ഫെഡറേഷന്‍ സംസ്ഥാന കമ്മിറ്റിയുടെ ആഭിമുഖ്യത്തില്‍ ഈ മാസം 26,27 തിയതികളില്‍ ദേശമംഗലം മലബാര്‍ എന്‍ജിനീയറിംഗ് കോളജില്‍ (വാദി ഖുബ) നടക്കുന്ന നാഷനല്‍ ഡെലിഗേറ്റ്‌സ് മീറ്റിന്റെ ഒരുക്കങ്ങള്‍ ആരംഭിച്ചതായി എസ്.എം.എഫ് തൃശൂര്‍ ജില്ലാ ഭാരവാഹികളായ പ്രസിഡന്റ് ചെറുവാളൂര്‍ ഹൈദ്രോസ് മുസ്‌ലിയാര്‍, ജനറല്‍ സെക്രട്ടറി ഹംസ ബിന്‍ ജമാല്‍ റംലി, മലബാര്‍ കോളജ് ചെയര്‍മാന്‍ കെ.എസ്. ഹംസ എന്നിവര്‍ അറിയിച്ചു.
ദേശീയ പ്രതിനിധി സംഗമത്തില്‍ എത്തിച്ചേരുന്ന 5000 പ്രതിനിധികളെ സ്വീകരിക്കുന്നതിനായി 20400 സ്‌ക്വയര്‍ഫീറ്റ് ശീതീകരിച്ച പന്തലിന്റേയും, 5000 സ്‌ക്വയര്‍ഫീറ്റ് ഭക്ഷണശാലയുടേയും പ്രവൃത്തികള്‍ പൂര്‍ത്തിയായി വരുന്നതായി വര്‍ക്കിംഗ് കണ്‍വീനര്‍ ബഷീര്‍ കല്ലേപ്പാടം, കോ ഓര്‍ഡിനേറ്റര്‍ സയ്യിദ് ഷാഹിദ് കോയ തങ്ങള്‍ എന്നിവര്‍ അറിയിച്ചു.
5000 പ്രതിനിധികള്‍ക്ക് ഭക്ഷണ താമസ സൗകര്യങ്ങള്‍ ഏര്‍പ്പെടുത്തിയിട്ടുണ്ട്.
പ്രതിനിധികളെ വാദിഖുബയിലെത്തിക്കാന്‍ ബസ് സൗകര്യം ഒരുക്കിയിട്ടുണ്ടെന്നും ഭാരവാഹികള്‍ അറിയിച്ചു. എസ്.എം.എഫ് സംസ്ഥാന കമ്മിറ്റി ജനറല്‍ സെക്രട്ടറിയുടെ നേതൃത്വത്തിലുള്ള സംസ്ഥാന പ്രതിനിധി സംഘവും സ്ഥലം എം.എല്‍.എ യു.ആര്‍ പ്രദീപും ഇന്ന് വാദിഖുബയിലെത്തും.
ജില്ലയിലെ മഹല്ലുകളില്‍ നിന്ന് പങ്കെടുക്കുന്ന പ്രതിനിധികളുടെ ബയോഡാറ്റയും, മേഖലാ കമ്മിറ്റികളുടെ വിഹിതവും 25 ന് മുന്‍പായി ജില്ലാ കമ്മിറ്റിയെ എല്‍പ്പിക്കണമെന്നും ഭാരവാഹികള്‍ അറിയിച്ചു.