കക്കട്ടില്‍: കുറ്റ്യാടി-നാദാപുരം സംസ്ഥാന പാതയില്‍ ലോറിയിടിച്ച് കെ.എസ്.ആര്‍.ടി.സി ബസ് കടയിലേക്ക് പാഞ്ഞുകയറി. ഇന്നലെ പുലര്‍ച്ചെ കക്കട്ടില്‍ നരിപ്പറ്റ റോഡിന് സമീപമാണ് അപകടം ഉണ്ടായത്. പുലര്‍ച്ചെയായതിനാല്‍ വന്‍ ദുരന്തം ഒഴിവായി.
5 മണിക്ക് കൈവേലി കുമ്പളച്ചോലയില്‍ നിന്ന് തൃശൂരിലേക്ക് പോകുന്ന കെ.എസ്.ആര്‍.ടി.സി ബസ്സാണ് അപകടത്തില്‍ പെട്ടത്. നരിപ്പറ്റ റോഡില്‍ നിന്ന് വന്ന നാഷനല്‍ പെര്‍മിറ്റ് ലോറി ബസ്സിന്റെ പിന്നിലിടിക്കുകയും നിയന്ത്രണം വിട്ട ബസ് കട ഇടിച്ച് തകര്‍ക്കുകയായിരുന്നു.
കടയുടെ മുന്‍ഭാഗം പൂര്‍ണ്ണമായും തകര്‍ന്നു. ബസ് ഡ്രൈവര്‍ക്ക് പരുക്കേറ്റു. ബസ് യാത്രക്കാര്‍ പരിക്കേല്‍ക്കാതെ രക്ഷപ്പെട്ടു.
സംസ്ഥാന പാതയിലെ വര്‍ധിച്ചു വരുന്ന അപകടങ്ങള്‍ തടയാന്‍ വേഗ നിയന്ത്രണ സംവിധാനമൊരുക്കണമെന്ന് നാട്ടുകാര്‍ ആവശ്യപ്പെട്ടു.