കാട്ടിക്കുളം: ഇടയുര്‍കുന്ന് പ്രദേശത്ത് കാട്ടുപോത്തുകള്‍ ഭീതിപരത്തുന്നു. കഴിഞ്ഞ 10 ദിവസത്തോളമായി പ്രദേശവാസികളുടെ ഉറക്കംകെടുത്തുന്ന കാട്ടുപോത്തുകളെ ഓടിക്കാന്‍ വനം വകുപ്പ് തയാറാകാത്തതില്‍ പ്രതിഷേധിച്ച് നാട്ടുകാര്‍ വനപാലകരെ തടഞ്ഞുവയ്ക്കുകയും ചെയ്തു.
കാട്ടുപോത്തുകള്‍ പ്രദേശത്തെ കാപ്പിത്തോട്ടങ്ങളിലാണ് തമ്പടിക്കുന്നത്. ജനങ്ങള്‍ക്ക് പുറത്തിറങ്ങാന്‍ കഴിയാത്ത അവസ്ഥയാണെന്നും ഓടിക്കാന്‍ ശ്രമിക്കുമ്പോള്‍ പ്രദേശവാസികളെ കാട്ടുപോത്തുകള്‍ ആക്രമിക്കുകയാണെന്നും നാട്ടുകാര്‍ പറഞ്ഞു. ഫോണ്‍ വിളിച്ചാല്‍ വനപാലകര്‍ എടുക്കാറില്ലെന്നും ഇടയൂര്‍ക്കുന്ന് വാസികള്‍ പറയുന്നു.
നാട്ടുകാര്‍ പ്രതിഷേധവുമായി തൃശിലേരി ഫോറസ്റ്റ് സെക്ഷന്‍ ഓഫിസിലെത്തിയതിനു ശേഷമാണ് കാട്ടുപോത്തുകളെ തുരത്താന്‍ ഉദ്യോഗസ്ഥരെത്തിയത്. തുടര്‍ന്ന് രോഷകുലരായ നാട്ടുകാര്‍ മണിക്കൂറുകളോളം വനപാലകരെ തടഞ്ഞുവച്ചു.
കഴിഞ്ഞ ദിവസം നാട്ടുകാരും വനപാലകരും കാട്ടുപോത്തുകളെ തോട്ടങ്ങളില്‍ നിന്ന് തുരത്താന്‍ ശ്രമിച്ചെങ്കിലും മറ്റു തോട്ടങ്ങളിലേക്കാണ് ഇവ കടക്കുകയായിരുന്നു. വേനല്‍ കനത്തതോടെ ഭക്ഷണം തേടിയാണ് ഇവ ജനവാസമേഖലയില്‍ എത്തുന്നത്. പോത്തുകളെ ഓടിക്കാനുള്ള ശ്രമം തുടരുകയാണ്.