ആനക്കര: വീട്ടുകാരില്ലാത്ത തക്കത്തില്‍ വീട്ടില്‍ നടത്തിയ മോഷണ സംഭവത്തില്‍ ബി.സി.എ വിദ്യാര്‍ഥിയായ സഹോദരന്‍ പിടിയിലായി. പട്ടിത്തറ പഞ്ചായത്തിലെ ഒതളൂര്‍ തേവാംകുളങ്ങര പരേതനായ കുഞ്ഞുമരക്കാരുടെ മകന്‍ ഷെഫീഖിന്റെ വീട്ടിലാണ് മോഷണം നടന്നത്. സംഭവത്തിന്റെ തുടക്കത്തില്‍ തന്നെ പൊലിസിന് സഹോദരനെ സംശയമുണ്ടായിരുന്നു. പകല്‍ നടന്ന സംഭവമായതിനാല്‍ ബന്ധുക്കളെ കേന്ദ്രീകരിച്ച് തന്നെയാണ് പൊലിസ് അന്വേഷണം നടത്തിയത്.
ഒടുവില്‍ മോഷണം നടത്തിയത് പരാതിക്കാരനായ ഷെഫീഖിന്റെ സഹോദരന്‍ ഷാഹിദ് (20 ) ആണന്ന് പൊലിസ് കണ്ടെത്തുകയും പ്രതിയെ തന്ത്രപൂര്‍വ്വം വലയിലാക്കുകയുമായിരുന്നു. ബാഗ്ലൂരില്‍ പഠിക്കുന്ന ഷാഹിദിന് അവിടെ ബൈക്കും മറ്റും വാങ്ങിയ വകയില്‍ കടമുണ്ടായിരുന്നു. ഇത് വീട്ടാനാണ് വീട്ടില്‍ നിന്ന് തന്നെ മോഷണം നടത്താന്‍ കാരണമായതെന്ന് പ്രതി പൊലിസിനോട് പറഞ്ഞു. വീട്ടിലുണ്ടായിരുന്നവര്‍ ആശുപത്രിയിലേക്കും വിവാഹത്തിനും പോയതക്കത്തിലാണ് 17 പവനും 10,000 രൂപയും മോഷ്ടിച്ചത്. പട്ടാമ്പി സി.ഐ സുരേഷ്, തൃത്താല എസ്.ഐ രജ്ഞിത്ത്, ലൈസദ് മുഹമ്മദ്, എസ്.സി.പി.ഒ ജയചന്ദ്രന്‍, സി.പി.ഒ.എസ്മാരായ ബിജു, ബഷീര്‍, ശ്രീകുമാര്‍ എന്നിവരടങ്ങുന്ന സംഘമാണ് പ്രതിയെ പിടികൂടിയത്. പട്ടാമ്പി കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു.