തിരൂര്‍: അഞ്ചുകിലോ കഞ്ചാവുമായി യുവാവ് എക്‌സൈസിന്റെ പിടിയില്‍. ചില്ലറ വില്‍പനക്കാര്‍ക്ക് കഞ്ചാവ് എത്തിച്ചുനല്‍കുന്ന മൊത്ത വില്‍പനക്കാരനായ കുറ്റിപ്പാല ക്ലാരി സ്വദേശി ഷെരീഫി (34)നെയാണ് ഇന്നലെ ഉച്ചയോടെ തിരൂര്‍ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ഹരികൃഷ്ണ പ്രസാദും സംഘവും പിടികൂടിയത്.
തെരഞ്ഞടുപ്പിന്റെ ഭാഗമായുള്ള പരിശോധനയുമായി ബന്ധപ്പെട്ട് രാത്രികാലങ്ങളിലടക്കം റെയ്ഡും പട്രോളിങ്ങും ശക്തമായി നടന്നുകൊണ്ടിരിക്കെ 500 ഗ്രാം കഞ്ചാവുമായി കഴിഞ്ഞ ദിവസം വൈലത്തൂര്‍ സ്വദേശിയെ പിടികൂടിയിരുന്നു. ഇയാളില്‍നിന്നു ലഭിച്ച വിവരത്തിന്റെ അടിസ്ഥാനത്തില്‍ കഞ്ചാവ് മൊത്ത വില്‍പനക്കാരനായ ഷെരീഫിനെക്കുറിച്ച് വിവരം ലഭിക്കുകയായിരുന്നു. തുടര്‍ന്നു നടത്തിയ അന്വേഷണത്തില്‍ ഇയാള്‍ ആന്ധ്രയില്‍നിന്നു സ്ഥിരമായി കഞ്ചാവ് എത്തിച്ച് ചെറുകിട കച്ചവടക്കാര്‍ക്ക് വില്‍പന നടത്തുന്ന വ്യക്തിയാണെന്നും കഴിഞ്ഞ ഒന്നര വര്‍ഷമായി ഈ പ്രവര്‍ത്തി ചെയ്യുകയാണെന്നും എക്‌സൈസ് ഉദ്യോഗസ്ഥര്‍ക്ക് മനസിലായി. തുടര്‍ന്നാണ് ഇയാളെ പിടികൂടിയത്.
ട്രെയിന്‍ മാര്‍ഗമാണ് ഇയാള്‍ കഞ്ചാവ് എത്തിച്ചിരുന്നത്. പ്രതിയെ കോടതിയില്‍ ഹാജരാക്കി.