കോഴിക്കോട്: അനുമതിയില്ലാതെ സ്‌കൂള്‍ കുട്ടികളെ കൊണ്ടുപോകുന്ന വാഹനങ്ങള്‍ കണ്ടെത്താനും നിയമ നടപടി സ്വീകരിക്കാനും മോട്ടോര്‍ വാഹന വകുപ്പിന്റെ ഫ്‌ളൈയിങ് സ്‌ക്വാഡ് രംഗത്ത്. സ്‌കൂള്‍ വാഹനങ്ങള്‍ അപകടത്തില്‍പ്പെടുന്ന സംഭവങ്ങള്‍ വര്‍ധിച്ച സാഹചര്യത്തിലാണിത്. പുതിയ അക്കാദമിക് വര്‍ഷത്തില്‍ മോട്ടോര്‍ വാഹന വകുപ്പ് പരിശോധന നടത്തി ഫിറ്റ്‌നസ് സര്‍ട്ടിഫിക്കറ്റ് നല്‍കി സ്റ്റിക്കര്‍ പതിച്ച വാഹനങ്ങള്‍ക്കു മാത്രമേ നിലവില്‍ സ്‌കൂള്‍ കുട്ടികളെ കൊണ്ടുപോകാന്‍ അനുവാദമുള്ളൂ. ഓട്ടോയും ജീപ്പും മറ്റു വാഹനങ്ങളും അനുമതിയില്ലാതെ സ്‌കൂള്‍ കുട്ടികളെ കൊണ്ടുപോകുന്നുണ്ട്. ഇത്തരം വാഹനങ്ങളെല്ലാം ഫ്‌ളൈയിങ് സ്‌ക്വാഡിന്റെ പിടിയിലാകും.
മഫ്തിയിലുള്ള സംഘമാണ് വാഹന പരിശോധന നടത്തുക. ഒപ്പം കുട്ടികളെ കുത്തിനിറച്ചു കൊണ്ടുപോകുന്ന സ്വകാര്യ വാഹനങ്ങള്‍ക്കെതിരേയും വിദ്യാര്‍ഥികള്‍ക്ക് ഇളവ് അനുവദിക്കാത്ത ബസുകള്‍ക്കെതിരേയും ഫ്‌ളൈയിങ് സ്‌ക്വാഡ് നടപടിയെടുക്കും. കഴിഞ്ഞ അക്കാദമിക് വര്‍ഷത്തില്‍ 200ഓളം വാഹനങ്ങളാണ് മോട്ടോര്‍ വാഹന വകുപ്പ് പരിശോധന നടത്തി സ്റ്റിക്കര്‍ പതിച്ചത്. അഞ്ചു വര്‍ഷത്തില്‍ കുറയാത്ത പ്രവൃത്തിപരിചയമുള്ള ഡ്രൈവര്‍മാരെ മാത്രമേ സ്‌കൂള്‍ വാഹനങ്ങളില്‍ നിയമിക്കാവൂ എന്ന നിയമം നില്‍നില്‍ക്കെത്തന്നെ ശരിയായ രീതിയില്‍ വാഹനമോടിക്കാന്‍ പോലും അറിയാത്ത ആളുകളാണ് കുട്ടികളെ സ്‌കൂളുകളിലെത്തിക്കുന്നതെന്ന ആക്ഷേപവും ശക്തമാണ്.
മോട്ടോര്‍ വാഹന നിയമലംഘനത്തിനും അമിത വേഗത്തിനും മദ്യപാനത്തിനും വര്‍ഷത്തില്‍ രണ്ടുതവണയില്‍ കൂടുതല്‍ ശിക്ഷിക്കപ്പെട്ടവരെ ജോലിക്ക് നിയമിക്കരുതെന്ന നിര്‍ദേശവുമുണ്ട്. പല സ്‌കൂള്‍ ബസുകളിലും വേഗതാ നിയന്ത്രണ സംവിധാനങ്ങളില്ല. ഉള്ളതാവട്ടെ കാര്യക്ഷമമായി പ്രവര്‍ത്തിക്കുന്നുമില്ല. സമയനിഷ്ട പാലിക്കുന്നതില്‍ പ്രയാസം നേരിടുന്നുവെന്ന കാരണത്താലാണ് ഭൂരിഭാഗം സ്‌കൂള്‍ വാഹനങ്ങളും വേഗപ്പൂട്ട് പ്രവര്‍ത്തിപ്പിക്കാതിരിക്കുന്നത്.
40 കിലോമീറ്റര്‍ വേഗതയില്‍ മാത്രമേ സ്‌കൂള്‍ വാഹനങ്ങള്‍ ഓടിക്കാവൂ എന്നാണ് നിയമം. എന്നാല്‍ ഇവയെല്ലാം കാറ്റില്‍പ്പറത്തി സര്‍വിസ് നടത്തുന്ന വാഹനങ്ങളെല്ലാം പറക്കും സ്‌ക്വാഡിന്റെ വലയിലാകും.